‘जलवायु परिवर्तन र विपद् व्यवस्थापनमा स्थानीय सरकार एक हुनुपर्छ’

चितवन । जलवायु परिवर्तन, विपद् व्यवस्थापन तथा वातावरणका सम्बन्धमा स्थानीय सरकार एक भएर लाग्नुपर्नेमा सरोकारवालाहरुले जोड दिएका छन् ।

विज्ञापन

जिल्ला समन्वय समितिले आज चितवनमा आयोजना गरेको स्थानीय स्तरमा जलवायु परिवर्तन विपद् व्यवस्थापन तथा वातावरणसम्बन्धी कार्यशाला गोष्ठीमा सहभागीले विपद् र जलवायु परिवर्तनका विषयमा स्थानीय सरकारले सहकार्य गरेर काम गर्न सके प्रभावकारी हुने बताएका हुन् ।

भरतपुर महानगरपालिका प्रमुख रेनु दाहालले चितवनमा हरेक किसिमका विपद् आइपर्ने भन्दै यसलाई सामना गर्नका लागि सबै स्थानीय तहहरुले सहकार्यसहित काम गर्न आवश्यक रहेको बताइन् । जलवायु परिवर्तनले मानव जीवनमा जोखिम निम्त्याउन थालेको जनाउँदै उनले यसको प्रभाव घटाउन स्थानीय सरकारहरुले काम गरिरहेको जानकारी दिइन् ।

उनले भनिन्, “जोखिम व्यवस्थापनको काम भइरहेको छ, यसलाई अझै प्रभावकारी रुपमा गर्नु आवश्यक छ ।” यस्तै, जिल्ला समन्वय समितिका प्रमुख नारायणप्रसाद अधिकारीले स्थानीय तहहरुले जलवायु र वातावरणका क्षेत्रमा एक भएर काम गर्नुपर्ने बताए । उनले भने, “मानव जीवनसँग प्रत्यक्ष सरोकार राख्ने भएकाले वातावरण संरक्षणमा हामी एक जुट भएर लाग्नुपर्छ ।” संघीय सरकारले यी विषयलाई उच्च प्राथमिकता दिएर काम गरिरहेकाले स्थानीय तहबाट प्रभावकारी रुपमा काम गर्नुपर्नेमा उनले जोड दिए । उनले जिल्लाका सातै पालिका एकै ठाउँमा बसेर साझा रणनीति बनाउन आब्हान समेत गरे ।

उपप्रमुख कल्पना काफ्ले सापकोटाले बढ्दो जलवायु परिवर्तनको असर मानव स्वास्थ्यमा प्रत्यक्ष रुपमा परेको जनाउँदै यसलाई रोक्न सकेमा मात्र विपद् व्यवस्थापन गर्न सहज हुने धारणा राखिन् । । कार्यक्रममा विपदको अवस्था, स्थानीय तहको रणनिति तथा दीगो समाधानका उपायको खोजी विषयमा कार्यपत्र प्रस्तुत गर्दै विज्ञ दिलु घिमिरेले अबको समयमा हुने विपद् र जलवायु परिवर्तनलाई सहन सक्ने गरी काम गरिनुपर्ने आवश्यकता औंल्याए । यसको क्षति न्यूनिकरणका लागि महत्वपूर्ण काम स्थानीय तहले गर्न आवश्यक रहेको उनको भनाइ थियो ।

जलवायु परिवर्तन तथा वातावरणको हालको अवस्था, संरक्षणका लागि सरोकारवालाको भूमिका विषयमा विज्ञ पुरुषोत्तम अर्यालले कार्यपत्र प्रस्तुत गर्दै स्थानीय सरकारले जलवायु परिवर्तन सम्बन्धी राष्ट्रिय नीति र योजनाको प्रभावकारी रुपमा कार्यन्वयन हुन नसक्दा समस्या देखिएको बताए । उनले जलवायु परिवर्तनका मुृद्दालाई विकासका योजनामा एकिकृत गर्ने गरी काम गर्न स्थानीय सरकारलाई सुझाव दिए ।

सो अवसरमा इच्छाकामना गाउँपालिकाका प्रमुख प्रशासकीय अधिकृत चन्द्रकान्त बस्नेत, भरतपुरका वातावरण तथा विपद् शाखाका विसुराम कुँवर, रत्ननगर नगरपालिकाका विपद् तथा वातावरण शाखाका विश्वास श्रेष्ठ, खैरहनी नगरपालिकाको विपद् तथा वातावरण शाखाका आशिष पौडेल, माडी नगरपालिकाका शिव सुवेदीले पालिकाले जलवायु परिवर्तन र विपद्का विषयमा गरेका कामका बारेमा प्रकाश पारेका थिए ।

जिल्ला समन्वय अधिकारी शर्माका अनुसार कार्यक्रममा जिल्लाका पालिकाका प्रमुख, उपप्रमुख, प्रमुख प्रशासकीय अधिकृत, वातावरण र विपद् शाखामा कार्यरत कर्मचारीको सहभागिता रहेको थियो । जिल्लामा एक महानगरपालिका, पाँच नगरपालिका र एउटा गाउँपालिका रहेको छ ।