जेनजी आन्दोलनका गम्भीर घाइते भएका दौलत अझै अचेत, सरकारले उपचारमा सहयोग नगर्दा आर्थिक समस्यामा परिवार

काठमाडौं । गत भदौ २३ र २४ गते भएको जेनजी आन्दोलनका क्रममा घाइते भएका सिन्धुपाल्चोकका ३२ वर्षीय दौलत थापा अझै वेहोस अवस्थामा अस्पतालमै छन् । भक्तपुरको मध्यपुर अस्पतालमा उपचार असंम्भव भएपछि काठमाडौंको राष्ट्रिय ट्रमा सेन्टरमा उनको अचेत अवस्थामा थप उपचार जारी छ । तर सरकारले आन्दोलनका कारण घाइते भएको होइन भन्दै उपचारमा सहयोग नगरेको उनको परिवारले जनाएको छ ।

घाइते थापाकी श्रीमती यमकला ठकुरी भन्छिन्, ‘२४ गतेको आन्दोलनमा उहाँको टाउकोमा गम्भीर चोट लागेको छ । दोब्बर अपरेशसन भइसकेपनि होस खुलेको छैन् । एक महिना हुन लागिसक्यो बेहोस नै हुनुहुन्छ । सरकारले उहाँलाई आन्दोलनकारी नभएको भनिरहेको छ तर उहाँसँग रहेको भिडियो र फोटोहरुले आन्दोलनमा प्रत्यक्ष सहभागि भएको देखिन्छ ।’

भक्तपुरको ठिमी बस्दै आएका दौलतका बुबा र श्रीमती यतिबेला सहयोगको याचना गर्दै भौतारिरहेका छन् । ‘हामीलाई थाहा छ, आन्दोलनका लागि भनेर उहाँ बानेश्वर आउनु भएको थियो । कतिखेर र कसरी घाइते हुनुभयो केही पत्तो पाइएन । एक्कैचोटी अस्पताल पुर्याउँदा मात्र थाहा पायौं । एकसातादेखि ट्रमा सेन्टरमै उपचार गराइरहेका छौं । सरकार उपचार गराउनुपर्छ भनेर अनेक वहान बनाइरहेको छ । आफ्नै खर्चले उपचार गर्न सकिरहेका छैनौं । ऋण खोजेर उपचार गराइरहेका छौं । हाम्रो विजोग भयो,’यमकलाले भनिन् ।

दौलतका बाबु गोरख बहादुर थापा आफनो छोरो आन्दोलनमा गएर घाइते भएको फोटो देखेपछि मात्र थाहा पाएको सुनाउँछन् । उनले २४ गतेका दिन सम्झदै भने, ‘छोरो पनि आन्दोलनमा गएको रहेछ मैले फोटो देखेपछि मात्रै थाहा पाएँ । अस्पताल लगेको छ भनेर राति साँढे ११ बजे मात्र थाहा पाएको हुँ । छोराको उपचारका लागि अस्पतालले एक लाख रुपैयाँ जम्मा गर्नुपर्छ भनेको छ । अपरेशनपछि सात दिन जति भेन्टिलेटरमा राखियो ।’

गोरखका छोरो दौलत आन्दोलनकै क्रममा गम्भीर घाइते भएको परिवारको दाबी छ । तर, उनको परिवारले आन्दोलनमा घाइते परिवारलाई सरकारले दिएको उपचार सुविधा र राहत पाएको छैन् । परिवारले आन्दोलनमा घाइते भएको दाबी गरिरहँदा सरकारले वेवास्ता गरेको भन्दै गुनासो गरेको छ । यतिबेला घाइते दौलतको उपचार खर्च धान्न नसक्दा समस्यामा परेको परिवारको गुनासो छ । ‘आर्थिक अवस्था कमजोर भएका कारण उपचार गर्न कठिन भइरहेको छ । पहिले भन्दा केही सुधार हुँदैछ भनेर डाक्टरहरुले भन्नु भएको छ । तर खर्च धान्न मुस्किल परिरहेको छ’ घाइतेका बुबा गोरखले भने ।

दौलतले आन्दोलनमा सहभागि भएको फोटो र भिडियोहरु सामाजिक संजालमा पनि पोष्ट गरेका थिए । साथै फेसबुकमार्फत लाइभ समेत गरेको भनेर परिवारका सदस्यहरुले जानकारी दिएका छन् । यद्यपी, सरकारले उनको उपचार गर्न र कार्ड प्रदान गर्न आनाकानी गरिरहेको परिवारको भनाइ छ ।

 

प्रतिक्रिया दिनुहोस्