जुम्ला । नाग्म–गमगढी सडकखण्डमा सात पक्की पुल निर्माण गरिएको छ । नाग्म–गमगढी सडकखण्डको ९३ किलोमिटर क्षेत्रमा तीन पक्की पुल निर्माण गर्न अझै बाँकी छ ।
जग्गा विवादका कारण तीन पुल निर्माण गर्न ढिला भएको सडक डिभिजन कार्यालय जुम्लाका प्रमुख दीपेन्द्रकुमार चौधारीले जानकारी दिए । पुल निर्माण हुने स्थानमा स्थानीयवासीको जग्गा परेको छ । सरकारले जग्गाको मुआब्जा दिने गरेको छैन । ‘बारम्बार जग्गाधनीसँग छलफल गर्दा निश्कर्षमा पुग्न सकिएको छैन। मुआब्जा दिनसके समस्या समाधान हुन्छ’, चौधरीले भने ।
हिमा गाउँपालिका जोड्ने पुल पनि जग्गा विवादका कारण निर्माण कार्य रोकिएको छ । कनकासुन्दरी गाउँपालिका गुठिज्यूलाको पुल घरटहराका कारण निर्माण कार्य अगाडि बढ्न सकेको छैन। मुगुको लुम्स पुल निर्माण घर तथा जग्गाका कारण रोकिएको प्रमुख चौधरीले बताए ।
स्थानीय सरकारलाई सहजीकरणका लागि आग्रह गरिएको उनको भनाइ छ । विवादका कारण तीन वर्षदेखि पुल निर्माणमा ढिलाइ भएको छ। चालु आर्थिक वर्ष २०८२÷८३ मा पुल निर्माण गर्न ४० लाख रुपैयाँ विनियोजन गरिएको प्रमुख चौधरीले जानकारी दिए। रासस
प्रतिक्रिया दिनुहोस्