म्याग्दी । म्याग्दीको मालिका गाउँपालिका–७ बिम अन्तर्गत बिमको तल्लोगाउँ र डाँडागाउँमा पक्की पदमार्ग निर्माण गरिएको छ । गाउँको सौन्दर्यकरण तथा स्थानीयको आवतजावत सहज बनाउन कच्ची पैदलमार्गलाई ढलान गरी पक्की बनाइएको हो ।
पदमार्ग निर्माणपछि बिम र डाँडागाउँका २०० भन्दा बढी घरपरिवार प्रत्यक्ष लाभान्वित भएका छन् । बालबालिका, ज्येष्ठ नागरिक तथा भारी बोकेर हिँड्ने स्थानीयलाई आवतजावत सहज भएको छ । बर्खामा हिलो, झाडी र सर्पको जोखिम कम हुनुका साथै गाउँ सफासुग्घर बनेको स्थानीयले बताएका छन् ।
डाँडागाउँकी मङ्गली पुनका अनुसार उकालो–ओरालोमा चिप्लिएर लड्ने समस्या हटेको छ भने भारी बोकेर हिँड्न पनि सहज भएको छ । वर्षायाममा झाडीमा भिज्दै हिँड्नुपर्ने बाध्यता हटेको उनले बताइन् ।
गण्डकी प्रदेश सरकारको सहयोगमा आर्थिक वर्ष २०८०/८१ देखि सुरु भएको पदमार्ग निर्माण कार्य चालु आर्थिक वर्षमा सम्पन्न गरिएको हो । पहिलो चरणमा पूर्वाधार विकास कार्यालयमार्फत विनियोजित ३० लाख रुपैयाँ बजेटबाट बिम तल्लोगाउँमा ४२५ मिटर र डाँडागाउँमा २५० मिटर पदमार्ग निर्माण गरिएको थियो ।
एकीकृत सेवा कार्यालयका इन्जिनियर सुमन बोगटीका अनुसार आर्थिक वर्ष २०८१/८२ मा १० लाख रुपैयाँ बजेटबाट तल्लोगाउँमा २९० मिटर नालीसहित पक्की पदमार्ग निर्माण गरिएको छ । चालु आवमै थप १० लाख रुपैयाँ बजेटबाट डाँडागाउँमा ५५० मिटर पदमार्ग निर्माण गरिएको उनले जानकारी दिए ।
पदमार्ग तेर्सो भागमा ढुङ्गा बिछ्याएर तथा उकालो भागमा सिँढी निर्माण गरी ढलान गरिएको छ । एक दशमलव १० देखि एक दशमलव २० मिटर चौडाइको पदमार्गमा मोटरसाइकल र साइकलसमेत सञ्चालन गर्न सकिने डाँडागाउँ पदमार्ग निर्माण समितिका अध्यक्ष भलाराम जुग्जालीले बताए ।
तल्लोगाउँका धनकुमार जुग्जालीका अनुसार यसअघि माटोको बाटोमा वर्षामा हिलो र हिउँदमा धुलोको समस्या थियो । अहिले ढलान गरिएको पदमार्ग सरसफाइ गर्न पनि सहज भएको उनले बताए । यद्यपि तल्लोगाउँमा चालु आवका लागि विनियोजित पाँच लाख रुपैयाँ बजेट इन्धन र निर्माण सामग्रीको मूल्यवृद्धिका कारण कार्यान्वयन हुन नसकेको उनले जानकारी दिए ।
बिम र डाँडागाउँ धार्मिक तथा पर्यटकीयस्थल मालिका र प्रभुचेला धुरीको फेदीमा पर्ने बस्ती हुन् । यहाँबाट गुर्जा हिमालको आकर्षक दृश्यावलोकन गर्न सकिन्छ । गण्डकी प्रदेशसभा सदस्य रेशमबहादुर जुग्जालीले गाउँलाई सरसफाइमा नमूना बनाउने उद्देश्यले पदमार्ग निर्माणका लागि बजेट विनियोजन गरिएको बताए ।
उनका अनुसार स्तरोन्नतिका क्रममा रहेको खारा–बिम सडक योजनाअन्तर्गत तल्लोगाउँ र डाँडागाउँभित्रको सडक कालोपत्र पनि गरिनेछ ।
प्रतिक्रिया दिनुहोस्