झापा । काँकरभिट्टा–लौकही सडक योजना अन्तर्गत झापा र मोरङमा आधुनिक ‘स्टिल आर्क’ प्रविधिका तीन ठूला पुल निर्माण द्रुतगतिमा अघि बढेको छ । आयोजनाका अनुसार हालसम्म पुल निर्माणतर्फ ४० प्रतिशत भौतिक प्रगति हासिल भएको छ ।
एसियाली राजमार्ग (एसियन हाइवे) अन्तर्गत पर्ने पाँचौँ प्याकेजमा झापाको रतुवा तथा मोरङको लोहन्द्रा र बक्राहा नदीमा आधुनिक प्रविधिका पुल निर्माण भइरहेका हुन् । आयोजना प्रमुख जगत प्रजापतिका अनुसार सम्झौताअनुसार आगामी २०८३ माघ १ गतेभित्र निर्माण सम्पन्न गर्नुपर्ने लक्ष्य छ ।
काँकरभिट्टादेखि सुनसरीको लौकहीसम्मको ९५ किलोमिटर सडकखण्डलाई विभिन्न प्याकेजमा विभाजन गरिएको छ । झापाको सीतापुरीदेखि पश्चिम खण्डमा पर्ने २० पुलमध्ये रतुवा, लोहन्द्रा र बक्राहा सबैभन्दा ठूला पुल हुन् ।
रतुवा नदीमा ५८५ मिटर, लोहन्द्रा नदीमा ३८५ मिटर र बक्राहा नदीमा ३१८ मिटर लामो पुल निर्माण भइरहेको छ । तीनवटै पुलमा आधुनिक र आकर्षक देखिने ‘स्टिल आर्क’ प्रविधि प्रयोग गरिएको आयोजना प्रमुख प्रजापतिले बताए ।
तीनवटा पुल निर्माणको ठेक्का कोभेक–सिआरइजिसी–चाइना स्टेट सेभेन्थ जेभीले पाँच अर्ब रुपैयाँमा लिएको छ । स्टिल संरचनासम्बन्धी उच्च प्राविधिक काम चिनियाँ कम्पनीले गरिरहेको छ भने बाँकी सिभिल निर्माण नेपाली साझेदार कम्पनीले सम्हालिरहेको जनाइएको छ ।
रतुवा नदीमा बन्ने ५८५ मिटर लामो ‘सिग्नेचर’ पुलमध्ये २६४ मिटर भाग स्टिल आर्क र बाँकी भाग कङ्क्रिट संरचनामा आधारित हुनेछ । यस पुलमा तीनवटा स्पान रहनेछन् । लोहन्द्रा नदीको ३८५ मिटर लामो पुलमा ८०–८० मिटरका दुई स्टिल स्पान रहनेछन् भने बक्राहा पुलमा पनि दुई स्पान रहने आयोजनाले जनाएको छ ।
मोरङको उर्लाबारी क्षेत्रमा स्टिलका पाटपुर्जा जडानको काम भइरहेको छ । त्यहाँ तयार गरिएका संरचनालाई पुलको मुख्य भागमा ल्याएर जडान गर्ने काम जारी रहेको आयोजना कार्यालयले जनाएको छ ।
वर्षायाममा पनि निर्माण प्रभावित नहुने गरी प्राविधिक तयारी मिलाइएको छ । हाल रतुवा पुललाई प्राथमिकतामा राखेर निर्माण कार्य अघि बढाइएको छ । रतुवामा तीनवटा स्पानको काम सकिएर अर्को आर्क जडानको तयारी भइरहेको आयोजनाले जनाएको छ ।
रतुवा पुलको पूर्वी भागबाट स्टिल आर्क विस्तार भइरहेको र स्टिलतर्फको अधिकांश काम सकिएको आयोजना प्रमुख प्रजापतिले बताए । उनका अनुसार अब मुख्य रूपमा कङ्क्रिटको काम बाँकी रहेकाले तोकिएकै समयमा निर्माण सम्पन्न गर्ने लक्ष्य राखिएको छ ।
यद्यपि प्राविधिक कारणले निर्धारित समयभन्दा करिब पाँच महिना थप लाग्न सक्ने आयोजनाको अनुमान छ । आयोजना कार्यालय र निर्माण कम्पनीका प्राविधिक टोली साइटमै निरन्तर खटिएको जनाइएको छ ।
प्रतिक्रिया दिनुहोस्