कर्पोरेट समाचार 
नारायणगढ (चितवन) । चितवन जिल्ला दुग्ध उत्पादक सहकारी सङ्घ ले समयमै दूधको भुक्तानी नपाउँदा जिल्लाका दुग्ध किसान मर्कामा परेको जनाएको छ । सङ्घका अनुसार दुग्ध विकास संस्थान (डिडिसी) र निजी उद्योगीसँग गरेर करिब ५५ करोड रुपैयाँ भुक्तानी बाँकी रहेको छ ।
सङ्घका अध्यक्ष किशोर बगालेका अनुसार डिडिसीसँग गत पुस १६ गतेदेखि किसानको भुक्तानी रोकिएको छ भने केही ठूला उद्योगीबाट तीन महिनादेखि रकम प्राप्त हुन सकेको छैन ।
उनले पछिल्लो समय डिडिसीबाट हुने भुक्तानीमा केही सुधार देखिए पनि समस्या पूर्ण रूपमा समाधान नभएको बताए । चारदेखि साढे चार महिनासम्म भुक्तानी रोकिँदा किसानको दैनिक जीवन सञ्चालनमै समस्या परेको उनको भनाइ छ ।
अध्यक्ष बगालेले सरकारले किसानको भुक्तानी छिटो गरिदिनुपर्ने माग गर्दै डिडिसी र अन्य उद्योगीबाट चाँडै रकम भुक्तानी हुने अपेक्षा गरिएको बताए ।
चितवनमा दैनिक तीन लाख ५० हजार लिटर दूध उत्पादन हुँदै आएको छ । जिल्लाका ११५ दुग्ध उत्पादन सहकारीमार्फत ४० हजार किसानले उत्पादन गरेको दूध बिक्री हुने गरेको सङ्घले जनाएको छ ।
सङ्घले आफ्नै उद्योगमार्फत दूध, दही, पनिर, चिज, मोही, नौनी र घ्युलगायत दुग्धजन्य वस्तु उत्पादन तथा बिक्री वितरण गर्दै आएको छ । रत्ननगरस्थित उद्योगबाट उत्पादन भएका सामग्री जिल्लाका विभिन्न मार्टमार्फत बिक्री हुँदै आएका छन् ।
यसैबीच भरतपुर महानगरपालिका ले बसेर उठ्न नसक्ने गाईलाई सुरक्षित रूपमा उठाउन प्रयोग गरिने ‘काउ लिफ्ट’ मेसिन वितरण गरेको छ ।
महानगरको पशुपन्छी विकास शाखाले आर्थिक वर्ष २०८२/८३ को कार्यक्रमअन्तर्गत ५० प्रतिशत अनुदानमा १० वटा मेसिन वितरण गरेको हो । चितवन जिल्ला दुग्ध उत्पादक सहकारी सङ्घलाई तीन, अन्नपूर्ण दुग्ध उत्पादन सहकारी संस्थालाई दुई तथा अन्य चार सहकारी र एक फार्मलाई एक–एक वटा मेसिन उपलब्ध गराइएको कृषि तथा पशुपन्छी व्यवसाय प्रवर्द्धन शाखाका प्रमुख शैलेन्द्र भण्डारीले जानकारी दिए ।
उनका अनुसार उन्नत जातका दुधालु गाईमा ‘डाउनर काउ सिन्ड्रोम’ देखिने भएकाले किसानलाई सहज बनाउन मेसिन वितरण गरिएको हो । मेसिनको सहायताले एक जना किसानले मात्रै पनि गाई उठाएर स्याहार गर्न सक्ने र गाई पुनः तंग्रिन मद्दत पुग्ने उनले बताए ।
प्रतिक्रिया दिनुहोस्