काठमाडौं । राष्ट्रिय साना शहरी खानेपानी तथा सरसफाइ उपभोक्ता महासंघ, नेपालले खानेपानी क्षेत्रमा लाग्दै आएको २५ प्रतिशत आयकर हटाउन सरकारसँग माग गरेको छ । बिहीबार काठमाडौंमा आयोजित पत्रकार सम्मेलनमा महासंघले राष्ट्रिय सभाबाट पारित संकल्प प्रस्ताव तत्काल कार्यान्वयन गर्न पनि आग्रह गरेको हो ।
महासंघका अध्यक्ष खेमराज ओलीले खानेपानी क्षेत्रमा कर तथा भ्याट छुट, विद्युत महसुलमा सहुलियत, नगर विकास कोषको ऋणको ब्याजदर घटाउनुपर्ने तथा आयोजना निर्माणमा जनसहभागिता रकम कम गर्नुपर्ने माग दोहोर्याए । उनले नेपालमै ब्लिचिङ पाउडर उद्योग स्थापना गर्नुपर्ने आवश्यकता पनि औंल्याए ।
ओलीका अनुसार यी माग समेटिएको संकल्प प्रस्ताव राष्ट्रिय सभाबाट २०८२ असार १२ गते पारित भए पनि राजनीतिक परिवर्तन र सरकार फेरबदलका कारण कार्यान्वयनमा ढिलाइ भएको हो । उनले वर्तमान सरकारले खानेपानी क्षेत्रको संवेदनशीलता नबुझी भौतिक पूर्वाधार मन्त्रालयमा गाभेर अपरिपक्व निर्णय गरेको आरोप लगाए ।
महासंघले आफ्ना माग कार्यान्वयन नभए संघर्षमा उत्रिने चेतावनी समेत दिएको छ । महासंघका वरिष्ठ उपाध्यक्ष रामचन्द्र उपाध्यायले जेठ ८ गते काठमाडौंमा हुने सातौं साधारण सभाबाट खानेपानी तथा सरसफाइ क्षेत्रका विषयमा महत्वपूर्ण निर्णय गरिने जानकारी दिए ।
प्रतिक्रिया दिनुहोस्