चितवन । गर्मी बढेसँगै पानीको अभाव हुन थालेपछि चितवन राष्ट्रिय निकुञ्ज र बरण्डाभार क्षेत्रमा रहेका वन्यजन्तुका लागि नहरबाट पानी आपूर्ति सुरु गरिएको छ ।
खगेरी नहरबाट टिकौलीदेखि देवनगरसम्मको नौ किलोमिटर क्षेत्रमा पानी छोडिएको हो । यससँगै निकुञ्ज तथा बरण्डाभार क्षेत्रमा रहेका पोखरीहरू पुनर्भरण (रिचार्ज) गर्न पनि पानी उपलब्ध गराइएको छ । नारायणी लिफ्ट तथा खगेरी सिँचाइ आयोजनाका प्रमुख कुलप्रसाद चालिसेका अनुसार उक्त क्षेत्रमा रहेका १२ भन्दा बढी पोखरीमा पानी पुनर्भरणका लागि नहरबाट पानी छोडिएको छ । ‘अब निरन्तर रूपमा पानी छोडिनेछ,’ उनले भने ।
गर्मी याममा निकुञ्ज र बरण्डाभार क्षेत्रका तालतलैया सुक्दै जाँदा वन्यजन्तुलाई पानीको अभाव हुने गरेको छ । पानीको खोजीमा वन्यजन्तु बस्ती क्षेत्रमा पस्ने समस्या पनि बढ्ने गरेको छ । वन्यजन्तुको पानी आवश्यकतालाई ध्यानमा राख्दै हरेक वर्ष गर्मी मौसममा नहरमार्फत पानी छोड्ने गरिएको आयोजनाले जनाएको छ । यस वर्ष पनि नहर मर्मतपछि पानी प्रवाह सुरु गरिएको हो । उक्त क्षेत्र गैँडा, चित्तल, बाघ, भालुलगायत वन्यजन्तु तथा विभिन्न चराचुरुङ्गीको प्रमुख बासस्थान मानिन्छ ।
प्रतिक्रिया दिनुहोस्