धरान (सुनसरी)। चालु आर्थिक वर्ष २०८१/८२ मा ११ हजार ६०३ पर्यटकले कोशी टप्पु वन्यजन्तु आरक्ष भ्रमण गरेका छन् ।
कोशी टप्पु वन्यजन्तु आरक्ष कार्यालयका प्रमुख एवं वरिष्ठ संरक्षण अधिकृत भूपेन्द्रप्रसाद यादवका अनुसार भ्रमण गर्नेमा ११ हजार २१४ आन्तरिक पर्यटक रहेका छन् । यस्तै सार्क मुलुकबाट ८७ तथा अन्य मुलुकबाट ३०२ विदेशी पर्यटकले आरक्ष भ्रमण गरेका छन् । जैविक विविधता, दुर्लभ वन्यजन्तु तथा शान्त वातावरणका कारण कोशी टप्पु आन्तरिक तथा बाह्य पर्यटकको रोजाइमा पर्दै आएको छ । सुनसरी र सप्तरी जिल्ला भित्र सप्तकोशी नदीले बनाएको टापु क्षेत्रमा फैलिएको यो आरक्ष जङ्गली भैँसी (अर्ना) का लागि प्रसिद्ध छ । नेपालमा रैथाने अर्ना पाइने यो एक मात्र संरक्षित क्षेत्र हो ।
सन् १९८७ देखि रामसार सूचीमा सूचीकृत कोशी टप्पुमा घडियाल, मगरगोही, सोंस (डल्फिन) तथा विभिन्न प्रजातिका माछा पाइन्छन् । चराचुरुङ्गीको उच्च विविधताका कारण यसलाई ‘चराहरूको राजधानी’ समेत भन्ने गरिन्छ । प्राकृतिक सौन्दर्य र जैविक विविधताले भरिएको कोशी टप्पु पक्षी अवलोकन, अध्ययन तथा अनुसन्धानका लागि स्वदेशी तथा विदेशी पर्यटकको आकर्षण बन्दै आएको छ । आरक्षलाई पूर्वी भारतसँग जोडिएको जैविक मार्गका रूपमा पनि लिइन्छ ।
आरक्ष प्रमुख यादवका अनुसार चितुवाबाहेक अन्य ठूला मांसाहारी जनावरको सङ्ख्या न्यून भए पनि कोशी टप्पुले पूर्वी तराई–मधेस क्षेत्रको वन, वनस्पति, हावापानी र जैविक विविधताको प्रतिनिधित्व गर्दै आएको छ ।
प्रतिक्रिया दिनुहोस्