काठमाडौं । हिमालय अर्गनाइजेसनअन्तर्गत नेपालका लागि म्याक्सस सवारीसाधनको आधिकारिक आयातकर्ता तथा वितरक हिमालय मोटोक्स प्रालिले १६ सिट क्षमताको विद्युतीय मिनीबस ‘म्याक्सस ईडेलिभर ५’ नेपाली बजारमा सार्वजनिक गरेको छ। कम्पनीले यस मिनीबसको मूल्य ६९ लाख ५० हजार रुपैयाँ निर्धारण गरेको छ।
काठमाडौंमा आज आयोजित विशेष कार्यक्रममार्फत सार्वजनिक गरिएको यो मिनीबस होटल, रिसोर्ट, पर्यटन तथा व्यावसायिक यातायात क्षेत्रमा लक्षित छ। विद्युतीय सवारीसाधनको प्रयोग बढ्दै गएको अवस्थामा यात्रुको आराम, सुरक्षा र आधुनिक सुविधालाई प्राथमिकता दिएर नयाँ मिनीबस बजारमा ल्याइएको कम्पनीले जनाएको छ।
हिमालय अर्गनाइजेसनका अध्यक्ष ध्रुव थापा, निर्देशक आकाश गोल्छा र प्रबन्ध निर्देशक सौरभ थापाले संयुक्त रूपमा मिनीबस सार्वजनिक गरेका हुन्। कार्यक्रममा कम्पनीका प्रमुख कार्यकारी अधिकृत कपिल सिवाकोटीको पनि उपस्थिति थियो। यसअघि कम्पनीले म्याक्सस ईटेरोन९ विद्युतीय पिकअप नेपाली बजारमा ल्याएको थियो। नयाँ मिनीबस सार्वजनिक भएसँगै कम्पनीले व्यावसायिक विद्युतीय सवारीसाधनको आफ्नो उत्पादन दायरा विस्तार गरेको छ।
आधुनिक सुविधा र आरामदायी यात्रा
म्याक्सस ईडेलिभर५ मा १२.३ इन्चको स्पर्शपर्दा मनोरञ्जन प्रणाली जडान गरिएको छ। यसले ब्लुटुथ, युएसबी, ताररहित एप्पल कारप्ले तथा एन्ड्रोइड अटो सुविधा समर्थन गर्छ। त्यस्तै, चार तहमा समायोजन गर्न मिल्ने स्टेरिङ, आधुनिक चालक कक्ष तथा स्टेरिङमै उपलब्ध नियन्त्रण प्रणालीले चालकलाई सवारी सञ्चालन गर्न सहज बनाउने कम्पनीको भनाइ छ। यात्रुको आराम र सुविधालाई ध्यानमा राखेर तयार गरिएको यस मिनीबसलाई होटल, रिसोर्ट तथा पर्यटकीय गन्तव्यमा यात्रु ओसारपसारका लागि उपयोगी विकल्पका रूपमा प्रस्तुत गरिएको छ।
एकपटकको चार्जमा ४०० किलोमिटरसम्मको दूरी
विद्युतीय मिनीबसमा ६४ किलोवाट घण्टा क्षमताको क्याटल ब्याट्री जडान गरिएको छ। कम्पनीका अनुसार यसको अधिकतम शक्ति १२० किलोवाट र टर्क २४० न्युटन मिटर छ। यसले एनईडीसी परीक्षण मापदण्डअनुसार एकपटक पूर्ण चार्ज गर्दा ४०० किलोमिटरसम्म दूरी तय गर्न सक्छ। मिनीबसमा ७० किलोवाट क्षमतासम्मको द्रुत चार्जिङ सुविधा उपलब्ध छ। यस सुविधामार्फत ब्याट्रीलाई २० प्रतिशतबाट ८० प्रतिशतसम्म चार्ज गर्न करिब ३६ मिनेट लाग्ने कम्पनीले जनाएको छ।
सुरक्षाका लागि आधुनिक प्रविधि
म्याक्सस ईडेलिभर५ मा ३६० डिग्री दृश्य प्रणाली, स्वचालित आपत्कालीन ब्रेकिङ, अगाडिको सम्भावित ठक्करको चेतावनी, अनुकूलनशील गति नियन्त्रण, लेनबाट बाहिरिने चेतावनी तथा लेनमै राख्ने सहायता प्रणाली उपलब्ध छन्। त्यसैगरी, आपत्कालीन लेन नियन्त्रण, चालकको अवस्था निगरानी प्रणाली, चालक र अगाडिको यात्रुका लागि वायु थैली, विद्युतीय स्थिरता नियन्त्रण तथा टायरको हावाको चाप निगरानी प्रणालीसमेत समावेश गरिएको छ। २०० मिलिमिटर ग्राउन्ड क्लियरेन्स र मिश्रधातुका पाङ्ग्राले पनि यसलाई व्यावसायिक प्रयोगका लागि उपयोगी बनाउने कम्पनीको दाबी छ।
ब्याट्रीमा आठ वर्षको वारेन्टी
कम्पनीको विवरणअनुसार मिनीबसको ब्याट्रीमा आठ वर्ष र मोटरमा पाँच वर्षको वारेन्टी उपलब्ध हुनेछ। यसले विद्युतीय व्यावसायिक सवारीसाधनमा लगानी गर्न चाहने व्यवसायीलाई दीर्घकालीन सञ्चालन खर्च र मर्मतसम्भारसम्बन्धी योजना बनाउन सहयोग पुग्ने अपेक्षा गरिएको छ।
विश्वप्रसिद्ध एसएआईसी समूहअन्तर्गतको म्याक्सस ब्रान्डका सवारीसाधन चीनमा उत्पादन हुँदै आएका छन्। नयाँ मिनीबसमा उपलब्ध सुविधा र मूल्यका आधारमा अन्य प्रतिस्पर्धी सवारीसाधनसँग प्रतिस्पर्धा गर्न सक्ने कम्पनीको दाबी छ। म्याक्ससको सोरुम काठमाडौंको हात्तीसारमा रहेको छ।
नयाँ विद्युतीय मिनीबस सार्वजनिक गर्दै हिमालय अर्गनाइजेसनले आधुनिक सवारीसाधनको आयात तथा बिक्रीसँगै देशभर बिक्रीपछिको सेवा विस्तार गर्ने प्रतिबद्धता व्यक्त गरेको छ।
नेपालमा सार्वजनिक तथा व्यावसायिक यातायातलाई वातावरणमैत्री बनाउने प्रयास भइरहेका बेला १६ सिट क्षमताको यस्तो विद्युतीय मिनीबसले होटल, रिसोर्ट, पर्यटन व्यवसाय तथा यात्रुवाहक सेवामा नयाँ विकल्प थप्ने देखिन्छ।
प्रतिक्रिया दिनुहोस्