काठमाडौं । काठमाडौं महानगरपालिकाका प्रमुख प्रशासकीय अधिकृतलाई कार्यालय प्रवेशमा रोक्ने मेयर बालेन्द्र शाहको प्रयास उनकै कर्मचरीले असफल पारेका छन् ।
बिहीबार मेयर बालेन्द्र साहको निर्देशनमा प्रमुख प्रशासकीय अधिकृत गुरागाईंलाई रोक्न महानगर प्रहरी खटिएका थिए ।
केही बेरअघि प्रशासकीय अधिकृतलाई कर्मचारी र जनप्रतिनिधहरूले स्वागत गरेका थिए । बाक्लो संख्यामा परिचालिन नगरप्रहरीले अधिकृत रोक्ने प्रयासलाई महानगरका कर्मचारी र जनप्रतिनिधिले नै असफल बनाएका हुन् ।
कर्मचारी र जनप्रतिनिधको भिडले अधिकृतलाई सुरक्षा दिँदै कार्यकक्षमा लगेका छन् । गुरागाईंलाई कार्यकक्षमा प्रवेश गर्न नदिएपछि कर्मचारीहरूले ढोका फोड्ने प्रयास गरेका छन् । नगर प्रहरीद्धारा उनलाई रोक्न नदिँदै कर्मचारीहरूले गुरागाईँलाई कार्यकक्ष अगाडि पुर्याएका छन् । तर,गुरागाईं आफ्नो कार्यकक्षमा प्रवेश गर्न पाएका छैनन।
सो क्रममा बाक्लो संख्यामा तैनाथ महानगर प्रहरी र कर्मचारीबीच ठेलाठेलको स्थिति बनेको थियो । यस क्रममा केहीबेर कर्मचारीले नाराबाजी पनि गरेका थिए ।
तीन महिनापछि बिहीबार गुरागाईं महानगरपालिकाको कार्यालयमा हाजिर हुन पुगेका हुन् । अधिकृतको गाडीमा महानगर प्रहरीले ‘ह्वील लक’ गरेर गेटमै रोक्ने प्रयास गरेपनि अन्तत उनलाई कार्यालय प्रवेश गराइएको छ ।
महानगरपालिकाले आधिकारिक प्रक्रिया पूरा नगरी काठमाडौं टावरको नक्सा पार गरेको भन्दै उनीमाथि छानबिन गरेको थियो । पुरानो बसपार्कस्थित काठमाडौं टावरको नक्सा प्रक्रिया नपुर्याई पास गरेको भन्दै महानगरले प्रमुख प्रशासकीय अधिकृत सरोज गुरागाईंमाथि छानबिन गर्न समिति बनाएको छ । छानबिन समिति बनेसँगै गुरागाईं बिदामा बसेका थिए । महानगरका प्रवक्ता नवीन मानन्धर र मेयर साहका प्रमुख स्वकीय सचिव भूपदेव शाहले ५ पुसमा पत्रकार सम्मेलन गरी प्रक्रिया नै पूरा नगरी काठमाडौं टावरको नक्सा स्वीकृति दिएको भन्दै कानुन बमोजिम प्रक्रिया थालनी गर्ने जनाएका थिए ।
प्रशासकीय अधिकृतलाई हाजिर गराउन महानगरका प्रवक्ता नवीन मानन्धरसहितका वडाध्यक्षहरू कार्यालय पुगेका हुन् ।
प्रतिक्रिया दिनुहोस्