काठमाडौं ।चालु आर्थिक वर्ष २०८१-८२ को पहिलो ११ महिनामा नेपालले आफ्नो विदेशी व्यापारमा उल्लेखनीय वृद्धि गरेको छ। यो अवधिमा देशको कुल विदेश व्यापार १८ खर्ब ९२ अर्ब ३६ करोड रुपैयाँ पुगेको छ, जुन अघिल्लो वर्षको सोही अवधिको १५ खर्ब ९२ अर्ब ९६ करोड रुपैयाँको तुलनामा १८.८० प्रतिशतले बढी हो।
यो अवधिमा सबैभन्दा ठूलो सुधार निर्याततर्फ देखिएको छ। अघिल्लो वर्षको पहिलो ११ महिनामा १ खर्ब ३९ अर्ब २६ करोड रुपैयाँ बराबरको वस्तु विदेश पठाइएकामा यो वर्ष सोही अवधिमा निर्यात २ खर्ब ४७ अर्ब ५७ करोड रुपैयाँ पुगेको छ। निर्यातमा ७७.७७ प्रतिशतको वृद्धिले व्यापार घाटा न्यूनीकरणमा केही सहयोग पुगेको देखिन्छ। यद्यपि व्यापार घाटा अझै पनि उच्च नै रहेको छ। चालु आवको ११ महिनामा व्यापार घाटा १३ खर्ब ९७ अर्ब रुपैयाँ पुगेको छ, जुन अघिल्लो वर्षको तुलनामा ६.३० प्रतिशतले बढी हो।
आयाततर्फ पनि वृद्धि देखिएको छ। अघिल्लो वर्षको ११ महिनामा १४ खर्ब ५३ अर्ब रुपैयाँको वस्तु नेपाल भित्रिएकोमा यस वर्षको सोही अवधिमा आयात १६ खर्ब ४४ अर्ब रुपैयाँ पुगेको छ। आयात वृद्धिको दर १३.१५ प्रतिशत रहेको छ। यद्यपि निर्यातको हिस्सा कुल व्यापारमा बढेर १३.०८ प्रतिशत पुगेको छ, जुन अघिल्लो वर्ष ८.७४ प्रतिशत मात्र थियो। यसले नेपालले आयातमूखी संरचनाबाट विस्तारै बाहिरिने संकेत दिएको देखिन्छ।
आयात र निर्यातको अनुपात पनि अघिल्लो वर्षको तुलनामा घटेको छ। अघिल्लो वर्ष १०.४४ को अनुपातमा आयात भइरहेकोमा यस वर्ष त्यो अनुपात ६.६४ मा झरेको छ। यता कुल व्यापारमा आयातको हिस्सा भने ९१.२६ प्रतिशतबाट घटेर ८६.९२ प्रतिशतमा झरेको छ। यो सकारात्मक संकेत भए पनि समग्र व्यापार सन्तुलन अझै पनि गहिरो घाटामै रहेको तथ्य भने यथावत् छ।
प्रतिक्रिया दिनुहोस्