सुनचाँदीको मूल्यमा दिनदिनै नयाँ रेकर्ड, एक सातामै २६ हजार रुपैयाँले महँगियो सुन

काठमाडौं । नेपाली बजारमा सुनको मूल्यले आज पुनः ऐतिहासिक रेकर्ड बनाएको छ । शुक्रबार मात्र सुनको मूल्य तीन लाख रुपैयाँ नाघेर इतिहासकै उच्च दरमा कारोबार भएको थियो।

उक्त दिनको तुलनामा आइतबार फेरि सुनको मूल्य उच्च विन्दुमा पुगेर नयाँ रेकर्ड कायम गरेको छ । लगातार बढिरहेको सुनको भाउमा आज दुई हजार चार सय रुपैयाँले वृद्धि भएर पुनः हालसम्मकै उच्च मूल्यको कीर्तिमान बनेको हो।

नेपाल सुनचाँदी व्यवसायी महासंघका अनुसार आज सुनको मूल्य प्रतितोला तीन लाख ३ हजार ८ सय रुपैयाँ कायम भएको छ। अघिल्लो कारोबार दिन (शुक्रबार) एक तोला सुन तीन लाख एक हजार ४ सय रुपैयाँ पुगेर उच्च मूल्यको रेकर्ड कायम गरेको थियो ।

गत आइतबार एक तोला सुन दुई लाख ७८ हजार ८०० रुपैयाँमा कारोबार भएको थियो । एक साताको अवधिमै सुन २५ हजार सात सय रुपैयाँले महँगिएको छ ।

यस्तै आज चाँदीको मूल्य पनि हालसम्मकै उच्च विन्दुमा पुगेको छ। शुक्रबार ६ हजार एक सय ९० रूपैयाँमा कारोबार भएको चाँदीको भाउ आइतबार बढेर ६ हजार ४८० रुपैयाँ पुगेको छ । यो मूल्य अघिल्लो कारोबार दिन (शुक्रबार) को तुलनामा २९० रुपैयाँले बढी हो । एक हप्ताको अन्तरालमा चाँदीको भाउ पनि ५६६ रुपैयाँले वृद्धि भएको छ । अन्तर्राष्ट्रिय बजारमा आज सुन प्रतिऔंस ४ हजार नौ सय ८९ अमेरिकी डलरमा कारोबार भइरहेको छ।

 

प्रतिक्रिया दिनुहोस्