कर्पोरेट समाचार 
काठमाडौं। स्थानीय बजारमा आज पनि सुनचाँदीको मूल्यमा गिरावट आएको छ। आइतबारको तुलनामा आज सुन प्रतितोला १३ हजार ४०० रुपैयाँले सस्तिएको छ ।
नेपाल सुनचाँदी व्यवसायी महासङ्घका अनुसार आज एक तोला छापावाल सुनको कारोबार मूल्य दुई लाख ८६ हजार ६०० रुपैयाँ तय भएको छ । अघिल्लो दिन त्यति नै परिमाणको सुन प्रतितोला तीन लाख रुपैयाँमा खरिदबिक्री भएको थियो ।
गत बिहीबार अर्थात् माघ १५ गते एक तोला सुनको भाउ तीन लाख ३९ हजार ३०० रुपैयाँ पुगेर उच्च मूल्यको रेकर्ड कायम भएको थियो । त्यसको भोलिपल्टै शुक्रबार तीन लाख १८ हजार ८०० रुपैयाँमा झरेको सुन यो साताको पहिलो कारोबार दिन आइतबार तीन लाख रुपैयाँमा किनबेच भएको थियो । त्यसअघि गत बुधबार एक तोला सुनको मूल्य तीन लाख १८ हजार ८०० , मङ्गलबार तीन लाख नौ हजार ३०० रुपैयाँमा किनबेच भएको थियो । माघ १५ गते उच्च विन्दुमा पुगेको सुनको भाउ पछिल्लो तीन कारोबार दिनमै ५२ हजार ७०० रुपैयाँले मूल्य घटेको छ ।
यस्तै, आज चाँदीको मूल्य पनि घटेको छ । आइतबार पाँच हजार ५०० रुपैयाँ मूल्य कायम भएको चाँदी सोमबार पाँच हजार २०० रुपैयाँ निर्धारण भएको महासंघले जनाएको छ । हिजोको तुलनामा आज चाँदी प्रतितोला ३०० रुपैयाँले सस्तिएको हो । माघ १५ गते चाँदी हालसम्मकै उच्च विन्दुमा पुगेर प्रतितोला ७ हजार ५०५ रुपैयाँ कायम भएको थियो । त्यसयता रेकर्ड मूल्यबाट चाँदीको भाउ पनि तल झरेको छ ।
अन्तर्राष्ट्रिय बजारमा आइतबार प्रतिऔंस ४ हजार ८९३.२ डलरमा कारोबार भएको सुन सोमबार ४ हजार ६७९.२५ डलरमा झरेको छ । यस्तै चाँदी पनि ८५.३४ औंसबाट ६९.०६ डलरमा कारोबार भैरहेको अन्तर्राष्ट्रिय सञ्चारमाध्यमहरुले जनाएका छन् ।
प्रतिक्रिया दिनुहोस्