कर्पोरेट समाचार 
काठमाडौं। भिडिओ मार्केटिङ र क्रिएटर कोल्याबरेसनका लागि विश्वकै अग्रणी प्लेटफर्म भिलले नेपालमा पाइलट प्रोजेक्ट सुरु गर्ने भएको छ।
काठमाडौंमा आयोजित क्रिएटर मेलाको एक प्यानल छलफलका क्रममा भिलका संस्थापक तथा सीईओ दीलिप ढकालले यस्तो घोषणा गरेका हुन् । भिलको यो प्रवेशले नेपाली डिजिटल क्रिएटरहरूलाई विश्वव्यापी मापदण्डसँग जोड्ने र नेपालको डिजिटल अर्थतन्त्रमा एउटा नयाँ कोसेढुङ्गो साबित हुने अपेक्षा गरिएको छ ।
अमेरिकी बजारमा स्थापित भइसकेको यो प्लेटफर्मले अब नेपाली व्यवसायीहरूलाई पनि ‘अथेन्टिक’ भिडिओ सामग्रीमार्फत आफ्नो बजार विस्तार गर्न सहयोग पुर्याउने कम्पनीको विस्वास छ। भिलका सीईओ ढकालले आधुनिक क्रिएटर इकोनोमी केवल कन्टेन्ट निर्माणमा मात्र सीमित नभएर जीविकोपार्जन, विश्वास र मापनयोग्य प्रणालीसँग जोडिएको कुरामा जोड दिए। ढकालले भने, ‘नेपालमा अथाह सिर्जनशील प्रतिभाहरू छन्। हाम्रो पाइलट प्रोजेक्टले क्रिएटरहरूलाई उनीहरूको सीपबाट अर्थोपार्जन गर्न र ब्रान्डहरूलाई प्रमाणित क्रिएटरहरूसँग काम गर्न मद्दत गर्नेछ।’
यो परियोजनाको मुख्य उद्देश्य नेपालको बढ्दो क्रिएटर इकोनोमीलाई सहयोग पुर्याउनु र ब्रान्ड तथा क्रिएटरहरूबिचको सम्बन्धलाई थप प्रभावकारी बनाउनु रहेको छ । यसले नेपाली क्रिएटरहरूलाई व्यावसायिक अवसरहरूसँग जोड्ने र उनीहरूको वृद्धिका लागि आवश्यक प्रणाली विकास गर्ने लक्ष्य राखेको छ।
हाल विश्वभर क्रिएटर इकोनोमीको मूल्य २५० अर्ब डलर भन्दा बढी छ। नेपालमा यो क्षेत्र करिब ३ देखि ४ करोड अमेरिकी डलर बराबरको रहेको अनुमान गरिएको छ। तथ्याङ्क अनुसार नेपाली क्रिएटरहरूले वार्षिक रूपमा २ करोड ५० लाख डलरभन्दा बढी कमाइरहेका छन्, जसले नेपालमा यस क्षेत्रको उच्च सम्भावनालाई दर्साउँछ । अमेरिकी दूतावासको पहलमा आयोजित एक छलफलमा सान फ्रान्सिस्कोकी यूजीसी क्रिएटर भ्यारोनिका कामाचोले क्रिएटरहरूले सामना गरिरहेका समस्याहरूको बारेमा चर्चा गरे। उनका अनुसार धेरैजसो क्रिएटरहरूले स्पष्ट कार्यक्षेत्रको अभाव, भुक्तानीमा ढिलाइ र मानक प्रक्रियाको कमी जस्ता समस्या भोगिरहेका छन् ।
कार्यक्रममा क्रिएटरहरूलाई दिगो आम्दानीका स्रोतहरू निर्माण गर्नका लागि आवश्यक सीपहरू विकास गर्न आवश्यक सुझाव दिइएको थियो।
प्रतिक्रिया दिनुहोस्