काठमाडौं । निर्माण क्षेत्रसँग सम्बन्धित अन्तर्राष्ट्रिय प्रदर्शनी ‘नेपाल बिल्डकन’ को ११ औँ संस्करण आजबाट काठमाडौंको भृकुटीमण्डपमा सुरु भएको छ।
मिडिया स्पेस सोलुसन्स र फ्युचरएक्स ट्रेड फेयर एण्ड इभेन्टसको संयुक्त आयोजनामा सुरु भएको प्रदर्शनीमा ३०० भन्दा बढी स्वदेशी तथा विदेशी ब्राण्डका २०० भन्दा धेरै स्टलहरू राखिएका छन् ।
निर्माण उद्योगमा भित्रिएका आधुनिक प्रविधि, सेवा र सामाग्रीबारे जानकारी दिने उद्देश्यले विगत ११ वर्षदेखि मेला निरन्तर आयोजना हुँदै आएको छ। प्रदर्शनीमा आर्किटेक्चरल हार्डवेयर, मार्बल, टायल्स, स्यानिटरी वेयर, मोड्युलर किचन, लिफ्ट, एस्केलेटर, झ्याल–ढोका, सिमेन्ट र स्टिल लगायतका निर्माण सामाग्रीहरू प्रदर्शन गरिनेछन्।
साथै, निर्माण क्षेत्रका इन्जिनियर, आर्किटेक्ट, डिजाइनर, उत्पादक र वितरकहरूलाई एउटै थलोमा जोड्ने लक्ष्य रहेको आयोजकले जनाएको छ । यस्तै, स्वदेशी उत्पादनलाई अन्तर्राष्ट्रिय बजारसम्म पुर्याउन र विश्व बजारमा प्रचलित नवीन प्रविधिलाई नेपाली बजारमा भित्र्याउन यो प्रदर्शनी प्रभावकारी हुने अपेक्षा गरिएको छ। प्रदर्शनीको मुख्य प्रायोजक फ्लाईवर्ड इन्टेरियर रहेको छ भने लुम्बिनी सेरामिक्स (लेमिनार टायल्स) ‘पावर्ड बाई’ पार्टनरका रूपमा रहेको छ।
प्रतिक्रिया दिनुहोस्