काठमाडौं । कतारको दोहास्थित नेपाली दूतावासले इरानमा रहेका नेपालीलाई स्थानीय प्रशासनबाट पूर्वअनुमति लिएर मात्र यात्रा गर्न आग्रह गरेको छ । इरानसमेत हेर्ने दोहास्थित नेपाली दूतावासले शनिबार जारी गरेको सूचनामा भनिएको छ ‘इरानका सम्बन्धित अधिकारीहरूको पूर्वअनुमतिबिना यात्रा नगर्नुहोस्।’
दूतावासले मध्यपूर्वमा विकसित अवस्थालाई नजिकबाट नियालिरहेको जनाएको छ ।‘इरानी अधिकारीहरूले जारी गरेका सुरक्षा सल्लाह र निर्देशनहरूको कडाइका साथ पालना गर्नुहोस् । सकेसम्म घरभित्रै बस्नुहोस्, सतर्क रहनुहोस्, उचित सावधानी अपनाउनुहोस् र नेपाली समुदायसँग नियमित सम्पर्क राख्नुहोस् ।’
दूतावासले इरानमा रहेका कुनै नेपालीलाई समस्या परे दूतावासको टेलिफोन नं ९७४–६६२१४४१९ मा सम्पर्क गर्न समेत आग्रह गरेको छ ।
इजरायल र अमेरिकाले शनिबार बिहान संयुक्त रूपमा इरानमाथि आक्रमण गरेपछि नेपाली दूतावासले सूचना जारी गरेको हो। आफ्नो देशमाथि आक्रमण भएपछि जवाफमा इरानले इजरायलसँगै साउदी अरेबिया, युनाइटेड अरब इमिरेट्स, बहराइन, कतार र कुवेतमा रहेका अमेरिकी सैन्य वेसहरूमा समेत मिसाइल आक्रमण गरेको छ।
प्रतिक्रिया दिनुहोस्