पाल्हीनन्दन । भारतसँग जोडिएको बर्दघाट सुस्ता पश्चिम नवलपरासीको महेशपुर मूल भन्सार सडक समयमै निर्माण सम्पन्न नहुँदा स्थानीयवासीले सास्ती भोग्नुपरेको छ । पटकपटक म्याद थप हुँदासमेत सडक निर्माणले पूर्णता नपाउँदा पानी पर्दा हिलाम्मे र पानी नपर्दा धुलाम्मे हुने समस्या बढेको हो ।
भौतिक पूर्वाधार तथा यातायात मन्त्रालय अन्तर्गत सडक विभागको सडक डिभिजन कार्यालय बुटवलले महेशपुरदेखि हरपुरसम्म एक किलोमिटर तथा सुनवल बजारको ५०० मिटर सडक निर्माणको जिम्मा गौरीशङ्कर हिमालयन कन्स्ट्रक्सन कम्पनीलाई दिएको थियो ।
२०८० वैशाख २६ गते सम्झौता गरिएको उक्त सडक २०८१ वैशाख २६ गतेभित्र सम्पन्न गर्ने लक्ष्य राखिएको थियो । तर हालसम्म सडकको करिब ६५ प्रतिशत मात्र काम सम्पन्न भएको सडक डिभिजन कार्यालय बुटवलका इन्जिनियर सुशील पौडेलले जानकारी दिए ।
उनका अनुसार बिजुलीका खम्बा र खानेपानीका पाइप सार्न ढिलाइ भएकाले निर्माण कार्य प्रभावित भएको हो । “सडक निर्माण सम्पन्न गर्न जेठसम्म तेस्रो पटक अर्थात् अन्तिम म्याद थप गरिएको छ,” उनले भने ।
यता निर्माण कम्पनीले भने अलकत्राको मूल्य वृद्धि र अभावका कारण काम प्रभावित भएको जनाएको छ । गौरीशङ्कर हिमालयन कन्स्ट्रक्सन कम्पनीका दिलीप लामाले अलकत्रा अभावकै कारण तोकिएको समयमा काम सम्पन्न गर्न नसकिएको बताए ।
सडक निर्माणमा ढिलाइ हुँदा स्थानीयवासी र यात्रुहरू प्रत्यक्ष प्रभावित बनेका छन् । पाल्हीनन्दन गाउँपालिका–२ का वडाध्यक्ष जगदीश गुप्ताका अनुसार सडक धुलैधुलो हुँदा घरको आँगनमा बस्नसमेत समस्या भएको छ भने यात्रुहरूले नाकमुख छोपेर आवतजावत गर्नुपर्ने अवस्था छ । भारतबाट आउने मालवाहक सवारीसाधनलाई समेत आवतजावतमा कठिनाइ भइरहेको उनले बताए।
‘समयमै सडक निर्माण हुन नसक्दा पानी नपर्दा धुलाम्मे र पानी पर्दा हिलाम्मे हुने अवस्था छ,’ वडाध्यक्ष गुप्ताले भने, ‘जनताले सास्ती पाएका छन् । निर्माण व्यवसायी इमान्दार नहुँदा राज्यको रकम खेर गएको छ भने सर्वसाधारणले दुःख पाएका छन् ।’
प्रतिक्रिया दिनुहोस्