काठमाडौं । नेपालका लागि प्रोटोन सवारीसाधनको आधिकारिक वितरक जगदम्बा मोटर्सले नेपाली बजारमा आफ्नो विद्युतीय सवारीसाधन ९ईभी० पोर्टफोलियो विस्तार गर्ने तयारी तीव्र बनाएको छ ।
नेपालमा प्रोटोन ई–मास सेभेन १६० किलोवाटको सफल सुरुवातपछि कम्पनीले ईभी विस्तार योजनालाई थप गति दिने भएको हो । बजारमा आएको छोटो समयमै प्रोटोन ई–मास सेभेनले नेपाली उपभोक्ताबाट उत्साहजनक प्रतिक्रिया प्राप्त गरेको कम्पनीले जनाएको छ ।
मलेसियामा पनि प्रोटोनको ईभी बिक्री उल्लेख्य रूपमा बढेको छ । सन् २०२६ को जनवरीदेखि अप्रिलसम्मको अवधिमा मलेसियामा प्रोटोनको विद्युतीय सवारी बिक्री ३२९ प्रतिशतले वृद्धि भएको छ । सो अवधिमा ११ हजार ६१७ भन्दा बढी ग्राहकलाई सवारी हस्तान्तरण गरिएको कम्पनीले उल्लेख गरेको छ ।
बढ्दो मागलाई सम्बोधन गर्न प्रोटोनले तान्जुङ मालिमस्थित आफ्नो ईभी उत्पादन कारखाना विस्तारका लागि ३७ मिलियन मलेसियन रिङ्गिट लगानी गर्ने घोषणा गरेको छ । यससँगै कम्पनीले वार्षिक उत्पादन क्षमता दोब्बरभन्दा बढी बढाएर ४२ हजार युनिट पुर्याउने लक्ष्य लिएको छ ।
जगदम्बा मोटर्सका प्रतिनिधिले नेपालमा प्रोटोन ई–मास सेभेनले प्राप्त गरेको प्रतिक्रिया अत्यन्त उत्साहजनक रहेको बताउनुभयो । उहाँका अनुसार यसले नेपाली उपभोक्ता विद्युतीय सवारीतर्फ आकर्षित भइसकेको र गुणस्तरीय विकल्पको खोजीमा रहेको संकेत दिएको छ ।
हाल नेपाली बजारमा उपलब्ध प्रोटोन ई–मास सेभेन १६० किलोवाट क्षमताको विद्युतीय मोटरद्वारा सञ्चालित प्रिमियम इलेक्ट्रिक एसयूभी हो । एनईडीसी मापदण्डअनुसार यो गाडीले एकपटकको पूर्ण चार्जमा अधिकतम ४७५ किलोमिटरसम्म यात्रा गर्न सक्ने कम्पनीको दाबी छ ।
गाडीमा ३६० डिग्री सराउन्ड भ्यु क्यामेरा, उन्नत हेडरेस्ट स्पिकर प्रणाली, आधुनिक ड्राइभिङ प्रविधि, फराकिलो भित्री सजावट, सुरक्षा तथा कनेक्टिभिटी सुविधाहरू समावेश छन् ।
हाल ई–मास सेभेन खरिद गर्ने ग्राहकहरूले एक वर्षको निःशुल्क बीमा, एक वर्षको सडक कर छुट, निःशुल्क ७ किलोवाट क्षमताको होम चार्जर, ८ वर्षको वारेन्टी तथा आकर्षक नगद छुटजस्ता सुविधा प्राप्त गरिरहेको कम्पनीले जनाएको छ ।
यसैबीच, जगदम्बा मोटर्सले निकट भविष्यमा प्रोटोन ई–मास फाइभ पनि नेपाली बजारमा भित्र्याउने तयारी गरिरहेको छ । सन् २०२६ मा मलेसियाको सर्वाधिक बिक्री भएको विद्युतीय सवारी बनेको ई–मास फाइभ शहरी जीवनशैली र नयाँ पुस्ताको आवश्यकतालाई ध्यानमा राखेर विकास गरिएको मोडल हो ।
प्रोटोनका अतिरिक्त जगदम्बा मोटर्स नेपालमा टीभीएस दुईपाङ्ग्रे सवारी, चेरी वाण्डाका व्यावसायिक विद्युतीय सवारी तथा जेएमईभी विद्युतीय सवारीको आधिकारिक वितरकसमेत हो । कम्पनीले विभिन्न अन्तर्राष्ट्रिय ब्रान्डका विद्युतीय तथा आधुनिक सवारीसाधन उपलब्ध गराउँदै नेपालको विद्युतीय गतिशीलता क्षेत्रमा आफ्नो उपस्थिति थप सुदृढ बनाएको जनाएको छ ।
प्रतिक्रिया दिनुहोस्