काठमाडौं । नेपालमा आन्तरिक पर्यटनले अर्थतन्त्रमा महत्वपूर्ण योगदान पुर्याउँदै गएको देखिएको छ। आर्थिक वर्ष २०८१/८२ मा आन्तरिक पर्यटनले देशको कुल गार्हस्थ्य उत्पादन (जीडीपी)मा २.६५ प्रतिशत योगदान दिएको अनुमान गरिएको छ।
राष्ट्रिय तथ्यांक कार्यालयले सार्वजनिक गरेको ‘आन्तरिक पर्यटन सर्वेक्षण २०८१/८२’ अनुसार सो आर्थिक वर्षमा नेपालको कुल गार्हस्थ्य उत्पादन ५४ खर्ब ५४ अर्ब रुपैयाँ पुगेको थियो। त्यसमध्ये आन्तरिक पर्यटनबाट १ खर्ब ४४ अर्ब ४९ करोड रुपैयाँ बराबरको कुल मूल्य अभिवृद्धि भएको उल्लेख गरिएको छ।
सर्वेक्षणअनुसार समीक्षा अवधिमा आन्तरिक पर्यटनमार्फत ४ खर्ब ७ अर्ब १७ करोड रुपैयाँ बराबरको पर्यटकीय उपभोग भएको छ। यसबाट ३ खर्ब ३१ अर्ब ८४ करोड रुपैयाँ बराबरको उत्पादन सिर्जना भएको अनुमान गरिएको छ।
उत्पादन प्रक्रियामा प्रयोग भएका वस्तु तथा सेवाको लागत अर्थात् मध्यवर्ती उपभोग १ खर्ब ८७ अर्ब ३४ करोड रुपैयाँ रहेको सर्वेक्षणले देखाएको छ। उक्त लागत कटाएपछि आन्तरिक पर्यटनबाट सिर्जित कुल मूल्य अभिवृद्धि १ खर्ब ४४ अर्ब ४९ करोड रुपैयाँ पुगेको हो।
राष्ट्रिय तथ्यांक कार्यालयका अनुसार ४ खर्ब रुपैयाँभन्दा बढीको पर्यटकीय उपभोग र जीडीपीमा २.६५ प्रतिशत योगदानले आन्तरिक पर्यटन नेपालको अर्थतन्त्रको महत्वपूर्ण आधार बन्दै गएको संकेत गरेको छ। पछिल्ला वर्षहरूमा धार्मिक, सांस्कृतिक तथा मनोरञ्जनात्मक गन्तव्यप्रति बढ्दो आकर्षण र पर्यटनसम्बन्धी सेवाको विस्तारले आन्तरिक पर्यटनको आर्थिक योगदान निरन्तर बढिरहेको सर्वेक्षणले देखाएको छ।
प्रतिक्रिया दिनुहोस्