काठमाडौं । वैदेशिक रोजगारीका नाममा आकर्षक तलबको प्रलोभन देखाएर ३९ लाख रुपैयाँ ठगी गरेको आरोपमा दुई जना पक्राउ परेका छन्।
केन्द्रीय प्रहरी समाचारकक्षका अनुसार पक्राउ पर्नेमा काभ्रेका सरोज पन्त र रामेछापका अनिल खत्री रहेका छन्। उनीहरूलाई शनिबार पक्राउ गरिएको हो।
प्रहरीका अनुसार पन्तले एक युवकलाई आयरल्यान्ड पठाइदिने भन्दै १६ लाख रुपैयाँ ठगी गरेका थिए। यस्तै, खत्रीले दुबई पठाइदिने बहानामा छ जनाबाट २३ लाख रुपैयाँ असुलेको आरोप छ। दुवै अभियुक्तलाई थप अनुसन्धान तथा कारबाहीका लागि वैदेशिक रोजगार विभागमा पठाइएको प्रहरीले जनाएको छ।
यसैबीच, देशका विभिन्न जिल्लामा सञ्चालन गरिएको प्रहरी कारबाहीका क्रममा काठमाडौं, मोरङ, पर्सा, भक्तपुर, कैलाली, गोरखा, सुनसरी, बाँके, पाल्पा र झापाबाट लागूऔषधसहित १७ जना पक्राउ परेका छन्।
प्रतिक्रिया दिनुहोस्