काठमाडौं । देशका अधिकांश जिल्लामा वर्डफ्लु संक्रमण नियन्त्रणमा आए पनि काठमाडौं उपत्यका, भक्तपुर र काभ्रेपलाञ्चोकमा भने जोखिम अझै कायम रहेको छ । पशु सेवा विभागका अनुसार हालसम्म ११ जिल्लामा देखिएको संक्रमणमध्ये आठ जिल्लामा पूर्ण रूपमा नियन्त्रणमा आइसकेको छ भने तीन जिल्लामा नियन्त्रणका लागि निगरानी र व्यवस्थापनको काम जारी छ ।
जनघनत्व बढी भएका क्षेत्र तथा कुखुरा पालन व्यवसायको विस्तार भएका स्थानमा संक्रमण देखिन थालेपछि सतर्कता बढाइएको छ । विशेषगरी काठमाडौं उपत्यका आसपासका क्षेत्रमा कुखुरा फार्मको संख्या धेरै हुनु र बजारको चाप उच्च रहनुले संक्रमण नियन्त्रणमा चुनौती थपिएको विज्ञहरूको भनाइ छ ।
वर्डफ्लु कुखुरा तथा अन्य पन्छीमा लाग्ने संक्रामक रोग हो । संक्रमित पन्छीबाट अन्य पन्छीमा सजिलै फैलिन सक्ने भएकाले समयमै पहिचान, संक्रमित पन्छीको व्यवस्थापन र जैविक सुरक्षा उपाय अपनाउनु नियन्त्रणको मुख्य आधार मानिन्छ ।
पशु सेवा विभागका अनुसार झापा, मोरङ, सुनसरी, महोत्तरी, बारा, चितवनलगायतका जिल्लामा देखिएको संक्रमण अहिले नियन्त्रणमा आइसकेको छ । तर काठमाडौं, भक्तपुर र काभ्रेपलाञ्चोकमा भने संक्रमणको अवस्था अझै निगरानीमा रहेको विभागले जनाएको छ ।
संक्रमित क्षेत्रको स्थलगत अनुगमन गरी संघीय तथा स्थानीय सरकारको समन्वयमा आवश्यक नियन्त्रणका काम अघि बढाइएको छ । विभागको तथ्याङ्कअनुसार संक्रमण नियन्त्रणका क्रममा हालसम्म देशभर सात लाख ५४ हजार ५०० पन्छी, १० लाख ९१ हजार ३०३ अण्डा र दुई लाख ४३ हजार ६३५ केजी दाना नष्ट गरिएको छ ।
सरकारले संक्रमित क्षेत्र पहिचान गरी कुखुरा तथा अण्डाको ओसारपसारमा निगरानी बढाएको छ । साथै कुखुरा व्यवसायीलाई फार्ममा जैविक सुरक्षा अपनाउन, बाहिरी व्यक्तिको आवतजावत नियन्त्रण गर्न, नियमित सरसफाइ गर्न र अस्वस्थ पन्छी देखिएमा तत्काल सम्बन्धित निकायलाई जानकारी गराउन आग्रह गरिएको छ ।
विज्ञहरूका अनुसार वर्डफ्लु नियन्त्रणका लागि त्रासभन्दा सचेतना आवश्यक छ । संक्रमित पन्छीको वैज्ञानिक व्यवस्थापन, सुरक्षित उत्पादनको प्रयोग र उपभोक्ताको सावधानीले संक्रमणको जोखिम कम गर्न सकिने उनीहरूको भनाइ छ ।
स्वास्थ्य विज्ञहरूले राम्रोसँग पकाएर खाएको कुखुराको मासु र अण्डाबाट सामान्य अवस्थामा संक्रमणको जोखिम अत्यन्त न्यून हुने बताएका छन् । उनीहरूले नागरिकलाई अनावश्यक त्रसित नभई सावधानी अपनाउन आग्रह गरेका छन् ।
प्रतिक्रिया दिनुहोस्