काठमाडौं । आगामी चैत्र २३ गतेबाट शुरु हुने नेपाल बार एसोसिएसनको २७ औं केन्द्रीय कार्य समितिको निर्वाचनमा प्रजातान्त्रिक कानुन व्यवसायीहरुको संस्था डिएलएभित्र एक जनाको मात्र उम्मेदवारी परेको छ । उम्मेदवारीको टुंगो लगाउनु केही घण्टा अघि मंगलबार दिउँसो दुई बजेसम्म वरिष्ठ अधिवक्ता यदुनाथ खनालको मात्र अध्यक्ष पदमा दाबेदारी पेश गरेका छन् ।
बारले बिहीबार उम्मेदवारी दर्ताको समय तोकेको छ । बारभित्र यसअघि जस्तै प्रगतिशिल र प्रजातान्त्रिक गरी दुई खेमा देखिएका छन् । प्रजातान्त्रिक खेमाभित्र हालसम्म खनालको मात्र दावेदारी परेकाले उनको सम्भावना प्रबल देखिएको छ । वरिष्ठ अधिवक्ता खनाल यसअघि डिएलएको अध्यक्ष रहिसकेका छन् ।
खनाल यसअघिका बार अधिवेशनमा समेत अध्यक्षका लागि संगठनभित्र दावेदार मानिएका थिए । उनले यो पटक संगठनभित्रैबाट दबाब आएकाले आफू मैदानमा उत्रन लागेको बताए । डिएलएका अनुसार संगठनले मंगलबार साँझ उम्मेदवारको नाम टुंगो लगाउनेछ । अरु कसैको दावेदारी नपरेमा खनाल नै उम्मेदवार हुने डिएलए निर्वाचन तयारी समितिका एक सदस्यले बताए । त्यसबाहेक अरु आकांक्षीले उम्मेदवारीको दिएमा सहमतिमै नाम तय गर्ने संगठनले जनाएको छ ।
प्रतिक्रिया दिनुहोस्