काठमाडौं । सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले नेकपा (माओवादी केन्द्र) ले ‘जनयुद्ध’ बेचेर खाएको आरोप लगाएका छन् ।
बुधबार सहिद यदुकुमार गौतमको २६औँ स्मृति दिवसका अवसरमा राजधानीमा आयोजित एक कार्यक्रममा उनले माओवादी हिंसा भन्ने शब्दबाट किन भागेको ? भन्दै प्रश्न गरेका छन् ।
मन्त्री गुरुङले भने, ‘माओवादी हिंसा भन्ने शब्दबाट किन भागिरहेको छ ? माओवादबाट किन भागिरहेको छ ? जनयुद्ध त बेचेर खाइसक्यो।’ उनले माओवादी संकटमा भएर नाटक गरिरहेको आरोप लगाउँदै भने, ‘माओेवादको औचित्य समाप्त भयो । माओवादको ट्याग लगाइरहेको छ । जनयुद्ध ठिक भन्न सकेको छ आज ? ।’
गाउँ रित्तो हुन ‘जनयुद्ध’कालबाट सुरु भएको टिप्पणी गरेका उनले राजतन्त्र ‘बुलेट’बाट नभएर ‘ब्यालेट’बाट पराजित भएको उल्लेख गर्दै ‘जनयुद्ध’ गलत भएको टिप्पणी गरे । उनले भने, ‘हामीले मत खसालेर राजा फालेको इतिहास छ । माओवादीले हिंसात्मक बाटो रोजे, जसले मुलुकको विकासमा २५ वर्ष पर धकेलिएको छ ।’
नेकपा एमालेका उपमहासचिव समेत रहेका मन्त्री गुरुङले माओवादीलाई रुकुम, रोल्पाबाट पराजित नगरे देशमा अस्थिरता कायमै रहने चर्चा गरे । सामाजिक सञ्जालबाट धर्म, सांस्कृतिक सहअस्तित्व भड्काउन मानिस प्रयोग गरिएको भन्दै उनले सामाजिक सञ्जाल नियमनसम्बन्धी कानुन बनाउन लागेको बताए ।
प्रतिक्रिया दिनुहोस्