काठमाडाैं । नेपाल विद्युत प्राधिकरणका निवर्तमान प्रबन्ध निर्देशक कुलमान घिसिङले आफूले उद्योगीहरुबाट विद्युत महसुल उठाउन गरेको प्रयत्न नै पदबाट हटाउनुको मुख्य कारण बनेको बताएका छन् ।
शुत्रबार पत्रकार सम्मेलन गर्दै घिसिङले महसुल उठाउन खोज्दा माथिल्लो निकायबाट अवरोध भएको सुनाए । उनले लोडसेडिङको समयमा जनतालाई अध्यारोमा राखेर उद्योगीहरुलाई वितिरण गरेको विद्युतको महशुल उठाउन खोज्दा पटक पटक राजनीतिक दबाब र राजनीतिक हस्तक्षेप भएको बताए ।
उनले भने,‘ बक्यौता उठाउन मैले विभिन्न तत्वहरुको दबाब, राजनीतिक हस्तक्षेपलाई मैले टेरिन र मेरो नैतिकता दिएन ।’
आफूमाथि ६ पटक स्पष्टीकरण सोधिएको उल्लेख गर्दै उनले आफूलाई हजारौं कागजात मागेर हतोत्साही बनाउने काम सरकारबाट भएको बताए ।
उनले ‘सार्वजनिक संस्थाको बक्यौता उठाउन खोज्नु अपराध भएको हो?,’ भन्ने प्रश्न गर्दै भने , ‘यसको जवाफ जनताले दिने छन् ।’
उद्योगीलाई बक्यौतामा चित्त नबुझे विद्युत नियमन आयोग लगायतका निकायबाट समस्या समाधान गर्ने बाटो हुँदाहुँदै पनि आफूलाई हटाएर सरकारले राहतको श्वास फेरेको भनाइ उनको छ ।
प्रतिक्रिया दिनुहोस्