भक्तपुर । अन्तर्राष्ट्रिय शान्तिवक्ता, लेखक एवम् शान्तिदूत प्रेम रावतले ११ वर्षपछि नेपालमा दुई छुट्टाछुट्टै कार्यक्रममा सम्बोधन गरेका छन् ।
भक्तपुरको सिपाडोलमा बुधबार हजारौँ श्रोतामाझ सम्बोधन गरेका उनले यसै साता रुपन्देहीको सैनामैनामा पनि १ लाख बढी श्रोतालाई सम्बोधन गरेका थिए ।
कार्यक्रममा सम्बोधन गर्दै प्रेम रावतले मानव जीवनबारे आफ्नो धारणा राखेका थिए । उनले मानसिक स्वास्थ्यलाई महत्व दिनुपर्ने सम्बन्धमा केन्द्रित हुँदै जीवन र जगत प्रतिको मानव धारणामा समारात्मक सन्देश प्रवाह गर्ने गरी कार्यक्रमलाई सम्बोधन गरेका हुन् ।
बुधबार भक्तपुरमा आयोजित कार्यक्रममा उनले भने, “हामीले प्राप्त गरेको यो जीवन अत्यन्तै दुर्लभ छ । सत्यता के हो ? तीनओटा कुरा सबैका लागि समान छन् । पहिलो तपाईँको जन्म भएको छ, दोस्रो तपाईँ अहिले जीवित हुनुहुन्छ । तपाईँभित्र श्वास आइरहेको अनि गइरहेको छ । अनि, तेस्रो चाहिँ एक दिन तपाईँले यो संसारबाट बिदा लिनुपर्ने छ ।”
व्यक्तिले आफ्नो जीवनमा कुन कुरालाई प्राथमिकता दिनुपर्छ जीवनमा बाहिरी भन्दा आन्तरिक आनन्दको अनुभव गर्न आवश्यक पर्छ भन्ने सम्बन्धमा उनले आफ्ना अनुभवहरु सुनाए । हरेक व्यक्तिलाई आशा र शान्तिको सन्देश प्रदान गर्दै उनले जीवनप्रति सकारात्मक दृष्टिकोण राखेर प्रस्तुत हुनुपर्नेमा जोड दिए । यस्तै, आन्तरिक सुख र शान्ति सम्बन्धी व्यावहारिक मार्ग देखाउन उनले विभिन्न कार्यक्रमहरुमार्फत प्रेरणा दिँदै आएका छन् ।
प्रेम रावतको बारेमा :
प्रेम रावत न्युयोर्क टाइम्समा सर्वाधिक विक्री भएको पुस्तक ‘हियर ओर्सेल्फ‘ पुस्तकका लेखक हुन् । विश्वशान्तिदूतको भूमिकासँगै धेरै मानिसको जीवनमा सकारात्मक प्रभाव पार्न उनले भूमिका निवाह गर्दै आएका छन् ।
उनी ’द प्रेम रावत फाउन्डेसन’ (टीपीआरएफ) का संस्थापक हुन् । संस्थाले ‘जनभोजन’ कार्यक्रममार्फत भारत, नेपाल, घाना र दक्षिण अफ्रिकाका विपन्न वर्गका बालबालिका तथा अस्वस्थ वयस्कहरूलाई पौष्टिक भोजन प्रदान गर्दै आएको छ । यस्तै, उनले सञ्चालन गरेको ’पिस एजुकेसन कार्यक्रम’ मार्फत ५ लाखभन्दा बढी व्यक्ति लाभान्वित भएका छन् । यो कार्यक्रम विभिन्न देशका १ हजारभन्दा बढी जेलमा सञ्चालन भइरहेको छ ।
रावतको परिचय वक्ता र लेखक मात्र सिमित नभएर आविष्कारक, सङ्गीतकार, कलाकार, फोटोग्राफर एवं कुशल विमानचालक समेत हुन् ।
प्रतिक्रिया दिनुहोस्