काठमाडौं। अर्थमन्त्रीले सरकारको चालु दायित्व तीव्र गतिमा बढ्दै गएकाले स्वास्थ्य बीमा र रासायनिक मलमा दिइँदै आएको अनुदानमा आमूल सुधार गरिने बताएका छन् ।
मंगलबार राष्ट्रिय सभा बैठकमा विनियोजन विधेयकमाथि उठेका प्रश्नको जवाफ दिँदै अर्थमन्त्री डा. स्वर्णिम वाग्लेले मल र बीमाको बढ्दो दायित्व राज्यले धान्न नसक्ने स्पष्ट पारे । उनले स्वास्थ्य बीमा र मलको विषयमा बजेटमार्फत नै सम्बोधन गरेर अगाडि बढ्ने घोषणा गरे । अर्थमन्त्री वाग्लेले भने,‘ गत साल १० अर्ब विनियोजन गरिएको स्वास्थ्य बीमाको दायित्व आजको दिनमा ३० अर्ब नाघिसकेको छ। २८ अर्ब विनियोजन गरिएको कृषि मलको दायित्व अहिले ६६ अर्ब पुगेको छ । यो राज्यले धान्न सक्दैन । बजेटले त्यसलाई सम्बोधन गर्छ ।’
स्वास्थ्य बीमाको अवस्थालाई सुधार गर्न सरकारले नीति तथा कार्यक्रममै प्राथमिकता दिएको अर्थमन्त्रीले उल्लेख गरे । ‘स्वास्थ्य बीमाको समुल पुनर्संरचना गर्नेबारे सरकारको नीति तथा कार्यक्रमको ३५ नम्बर बुँदामा ठूलो प्रतिबद्धता आएको छ’ उनले भने, ‘त्यो प्रतिबद्धता हामी पूरा गर्छौँ।’
बढ्दो वित्तीय भारलाई व्यवस्थित गर्न र लक्षित वर्गसम्मै सुविधा पुर्याउन आगामी आर्थिक वर्षको बजेटमार्फत कृषि मल खरिद र बीमामा आमूल सुधारको योजना ल्याइने उनको भनाइ छ।
प्रतिक्रिया दिनुहोस्