काठमाडौं । स्थानीयहरुले बञ्चरेडाँडास्थित ल्याण्डफिल्ड साइटमा काठमाडौंको फोहोर व्यवस्थापन गर्न अवरोध गरेपछि शहरी विकासमन्त्री कुलमान घिसिङले स्थलगत अनुगमन गरेका छन् ।
तिहार लगत्तैदेखि उपत्यकाको फोहोर व्यवस्थापन हुन सकेको छैन । स्थानीय र प्रभावित क्षेत्रका नागरिकले झन्डै तीन वर्ष अघि सरकारसँग भएको स्थानीयहरूले स्वास्थ्य जाँच, मुआब्जा तथा पूर्वाधार विकासलगायत १८ बुँदे सहमति कार्यान्वयन गर्न सरोकारवालाको ध्यानाकर्षण गराउँदै आएका छन् । समस्या समाधानमा सरोकारवालाले चासो नदेखाएपछि धादिङ र नुवाकोटका प्रभावितले उपत्यकाको फोहोर बञ्चरेडाँडास्थित ल्याण्डफिल्ड साइटमा व्यवस्थापन गर्न दिएका छैनन् । जसकारण साता दिन अघिदेखि नै उपत्यकाको फोहोर संकलन नहुँदा सडक तथा गल्लीहरु दुर्गन्धित हुँदै गएको छ ।
फोहोर व्यवस्थापनमा संकट निम्तिएपछि शहरी विकासमन्त्री कुलमान घिसिङले बञ्चरेडाँडास्थित ल्याण्डफिल्ड साइटको आज अनुगमन गरेका छन् । मन्त्री घिसिङले स्थानीय प्रशासन, फोहोर व्यवस्थापन सम्बन्धित अधिकारीहरू तथा स्थानीय प्रतिनिधिहरूसँग छलफल गर्न बञ्चरेडाँडाको अनुगमन गरेको बताइएको छ ।काठमाडौं महानगरपालिका र अन्य स्थानीय तहहरूबाट दैनिक १ हजार २ सय टनभन्दा बढी फोहोर उत्पादन हुने गर्छ ।
प्रतिक्रिया दिनुहोस्