काठमाडौं । नेपाल राष्ट्र बैंकले आइतबार २० अर्ब रुपैयाँ निक्षेप बजारबाट झिक्ने भएको छ । केन्द्रीय बैंकले ८४ दिनको लागि आइतबार बजारबाट २० अर्ब रुपैयाँ निकाल्न लागेको हो । उक्त रकम आज मध्याह्न २ बजेसम्म अनलाइन प्रणालिमार्फत बोलकबोल हुने केन्द्रीय बैंकको मौद्रिक व्यवस्थापन विभागले जनाएको छ ।
राष्ट्र बैंकका अनुसार यसको ब्याजदर पनि बोलकबोल प्रक्रियाबाटै निर्धारण हुनेछ भने यसको सावाँ तथा ब्याज भुक्तानी आगामी २०८२ चैत २९ गते दिइने बताइएको छ। बोलकबोल प्रक्रियामा ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन पाउनेछन् । बैंक तथा वित्तीय संस्थाहरुले न्यूनतम पाँच करोड र अधिकतम १० करोड रुपैयाँले भाग गर्दा निःशेष भाग जाने गरी कुल आह्वान रकमसम्म बोलकबोल गर्न सक्नेछन् ।
निक्षेप संकलनको लागि आह्वान गरिएको रकम बाँडफाँड गर्दा बोलबमोजिम सबैभन्दा कम ब्याजदरलाई पहिलो प्राथमिकता क्रममा राखी आह्वान गरेको रकमसम्म क्रमशः बाँडफाँड गरिने बैंकले जनाएको छ । आह्वान गरिएको रकममध्ये सम्पूर्ण वा आंशिक रकमको बोल स्वीकार वा अस्वीकार गर्ने अधिकार खुला बजार कारोबार सञ्चालन समितिलाई रहनेछ ।
पछिल्लो समय राष्ट्र बैंकले पुषदेखि बैंकिङ प्रणालीमा रहेको तरलतालाई व्यवस्थापन गर्न लगातार जसो ऋणपत्र जारी गर्दै लामो अवधिका लागि रकम झिक्दै आएको थियो । तर, आज केन्द्रीय बैंकले वित्तीय प्रणालीको तरलता व्यवस्थापन गर्न झन्डै तीन महिना अवधिको निक्षेप झिक्न लागेको हो ।
प्रतिक्रिया दिनुहोस्