काठमाडौं । मध्यपूर्वमा जारी युद्धका कारण तेल आपूर्तिमा अवरोध र मूल्यमा तीव्र वृद्धि भएपछि युरोपका ठूला तेल तथा ग्यास कम्पनीहरूले पहिलो त्रैमासिकमा ठूलो नाफा कमाएका छन्।
यससँगै लन्डनदेखि पेरिससम्म उनीहरूको ‘असामान्य नाफा’मा थप कर लगाउनुपर्ने माग पुनः उठ्न थालेको छ। ‘शेल’ ले हालै आफ्नो नाफा सार्वजनिक गर्दै पहिलो त्रैमासिकमा करिब ५.७ अर्ब अमेरिकी डलर (झण्डै ४.८ अर्ब युरो) खुद नाफा कमाएको विवरण सार्वजनिक गरेको छ ।
जुन गत वर्षको सोही अवधिको तुलनामा १९ प्रतिशतले बढी हो। कम्पनीका अनुसार नाफा वृद्धि उच्च तेल मूल्य, सुधारिएको रिफाइनिङ मार्जिन र व्यापारिक गतिविधिबाट भएको हो ।
यस्तै, ‘बीपी’ले पनि नाफामा उल्लेखनीय वृद्धि देखाएको छ । यो कम्पनीले खुद नाफा मात्र ३.८४ अर्ब डलर पुगेको जनाएको छ । टोटालइनर्जीको नाफा भने अझ बढी वृद्धि हुँदै ५१ प्रतिशतले बढेर ५.८ अर्ब डलर पुगेको रिपोर्ट गरिएको छ । यसको विपरीत, अमेरिकी ऊर्जा कम्पनीहरू एक्सनमोबिल र चेभ्रोनको नाफा घटेको छ ।विशेषज्ञहरूका अनुसार डेरिभेटिभ बजारमा समयान्तर प्रभावका कारण अमेरिकी कम्पनीहरू प्रभावित भएका हुन् ।
तेल मूल्य वृद्धि र होर्मुज सङ्कट
मध्यपूर्व युद्धका कारण इरानले होर्मुज जलडमरूमध्यमा अवरोध सिर्जना गरेपछि विश्व बजारमा तेल आपूर्ति घटेको छ। जसको प्रभाव विश्वका धेरै देशहरुमा उच्च मूल्य वृद्धिका रुपमा देखिएको छ । मार्च महिनामा ब्रेन्ट क्रुड तेलको मूल्य औसत १०० डलर प्रति ब्यारेल पुगेको थियो भने कहिलेकाहीँ १२० डलरसम्म पुगेको थियो । युद्धअघि यो मूल्य करिब ७० डलर थियो । विश्लेषकहरूका अनुसार युरोपेली कम्पनीहरूले इरान–अमेरीका युद्धको लाभ लिएका छन् । उनीहरूको व्यापारिक गतिविधि बलियो रहेकाले पनि बजारको उतारचढावका बावजुद अतिरिक्त फाइदा आर्जन गरेका हुन् । एक ऊर्जा विश्लेषकले बताए अनुसार, यी कम्पनीहरू यस त्रैमासिकमा ‘परम्परागत तेल कम्पनीभन्दा बढी विश्व ऊर्जा बजारका जटिल ट्रेडरजस्तो’ देखिएका छन् ।
कर लगाउने दबाब बढ्दै
उच्च नाफापछि बेलायत र फ्रान्समा तेल कम्पनीहरूको नाफामा थप कर लगाउने माग बढेको छ। यसअघि युक्रेन युद्धपछि पनि यस्तै ‘विन्डफल कर’ लागू गरिएको थियो । बेलायतमा तेल कम्पनीहरू अहिले पनि नर्थ सी क्षेत्रको नाफामा ३८ प्रतिशत अतिरिक्त कर तिर्छन्, जुन सामान्य ४० प्रतिशत करसँगै लागू हुन्छ । तर यो कर केवल घरेलु उत्पादनमा मात्र सीमित छ। अब त्यही करलाई विस्तार गर्नुपर्ने माग बढिरहेको छ । फ्रान्सका राष्ट्रपति इम्यानुएल म्याक्रोले पनि अत्यधिक नाफा वा ‘सट्टेबाजी शैलीको कारोबार’ नियन्त्रण गर्न युरोपेली स्तरमा समन्वय आवश्यक रहेको बताएका थिए ।
भविष्यको बजार र ऊर्जा रणनीति
विश्लेषकहरूका अनुसार दोस्रो त्रैमासिकमा पनि कम्पनीहरूको नाफा बलियो रहने सम्भावना छ, किनभने बजार तुरुन्तै सामान्य अवस्थामा फर्कने देखिँदैन। तर दीर्घकालीन रूपमा कम्पनीहरू साना, कम लागतका र छिटो उत्पादन गर्न सकिने परियोजनामा ध्यान केन्द्रित गर्न सक्छन्। केही कम्पनीहरूले जलवायु लक्ष्यमा पुनर्विचार गर्दै तेल तथा ग्यास उत्पादनमा निरन्तरता दिने सङ्केत पनि दिएका छन् ।
यसैबीच, ऊर्जा सुरक्षा सुनिश्चित गर्न नवीकरणीय ऊर्जाको भूमिकाबारे पनि फेरि बहस सुरु भएको छ ।
प्रतिक्रिया दिनुहोस्