काठमाडौं। विश्व फुटबलको महाकुम्भ ‘फिफा विश्वकप २०२६’ अबको एक महिनापछि सुरु हुँदैछ। नेपालका लागि यस पटकको विश्वकप प्रसारणको विशेष अधिकार हिमालय स्पोर्ट्स र डी गो एपले प्राप्त गरेका छन्।
हालै काठमाडौंमा आयोजित एक विशेष समारोहका बीच नेपालमा विश्वकप प्रसारणसम्बन्धी औपचारिक घोषणा गरिएको हो। एसप्रो मिडियाले टेलिभिजनतर्फ हिमालय टेलिभिजन नेटवर्कको नयाँ च्यानल ‘हिमालय स्पोर्ट्स’ र डिजिटलतर्फ ‘डी गो’ एपसँग सम्झौता गरेको छ।
यो सँगै नेपाली दर्शकले यस पटक विश्वकपका सबै खेलहरू यी दुई माध्यमबाट मात्र हेर्न पाउनेछन् ।
विश्वकपका सबै १०४ खेलहरू हेर्नका लागि दर्शकले निश्चित शुल्क तिर्नुपर्नेछ। टेलिभिजनमा हेर्न चाहनेले ९९९ रुपैयाँ र प्रति सेटअप बक्स डीगो एपमा ७९९ तथा मात्रमोबाइल मात्र खेल हेर्न चाहनेले ५४९ रुपैयाँ तिर्नुपर्नेछ । ग्राहकले सेवा प्रयोगका लागि आफ्नो नजिकैको केबल अपरेटर वा टेलिभिजन सेवा प्रदायकसँग सम्पर्क गरी हिमालय स्पोर्ट्स च्यानल सब्सक्राइब गर्नुपर्नेछ।
यस पटकको विश्वकप अमेरिका, मेक्सिको र क्यानडामा संयुक्त रूपमा आयोजना हुँदैछ, जसमा ४८ टोलीहरूले प्रतिस्पर्धा गर्दैछन्।
प्रतिक्रिया दिनुहोस्