धुलिखेल (काभ्रेपलाञ्चोक)। काभ्रेपलाञ्चोकको महाभारत गाउँपालिका लगातार तेस्रोपटक शून्य बेरुजु कायम गर्न सफल भएको छ । आर्थिक वर्ष २०८१/८२ को लेखापरीक्षण प्रतिवेदनअनुसार गाउँपालिकाको एक अर्ब १३ करोड ७१ लाख ९० हजार रुपैयाँ बराबरको लेखापरीक्षण हुँदा बेरुजु शून्य देखिएको हो ।
यसअघि पनि लगातार दुई आर्थिक वर्ष शून्य बेरुजु कायम राखेको गाउँपालिकाले यस वर्ष पनि उक्त उपलब्धिलाई निरन्तरता दिएको हो ।
गाउँपालिका अध्यक्ष कान्छालाल जिम्बाले सङ्घीय, प्रदेश र स्थानीय तहका कानुन तथा गाउँसभाबाट पारित बजेटलाई प्रभावकारी रूपमा कार्यान्वयन गर्दा शून्य बेरुजु कायम गर्न सफल भएको बताए । उनले सञ्चालन खर्च घटाएर पुँजीगत खर्च बढाउने, अनावश्यक चन्दा तथा सहयोग वितरण नगर्ने र वित्तीय अनुशासनलाई कडाइका साथ पालना गर्ने नीतिले सकारात्मक परिणाम दिएको उल्लेख गरे ।
अध्यक्ष जिम्बाका अनुसार जनप्रतिनिधि र कर्मचारीले सामूहिक प्रतिबद्धतासहित नियम र कानुनको दायराभित्र रहेर काम गरेका कारण गाउँपालिका निरन्तर शून्य बेरुजु कायम गर्न सफल भएको हो । उनले यस उपलब्धिले देशभरका स्थानीय तहलाई सकारात्मक सन्देश दिएको बताए ।
सार्वजनिक प्रतिवेदनअनुसार काभ्रेपलाञ्चोकका १३ स्थानीय तहमध्ये नगरपालिकातर्फ मण्डनदेउपुर नगरपालिका सबैभन्दा कम ०.०५ प्रतिशत बेरुजुसहित अगाडि रहेको छ । गाउँपालिकातर्फ चौँरीदेउराली गाउँपालिकाको बेरुजु ०.१८ प्रतिशत रहेको उल्लेख गरिएको छ ।
प्रतिवेदनअनुसार पनौती नगरपालिकाको बेरुजु ३.०४ प्रतिशत, नमोबुद्धको १.३८, धुलिखेलको ०.६८, बनेपाको ०.७१, पाँचखालको ०.१, बेथानचोकको ०.५५, तेमालको ०.५, खानीखोलाको ०.५८, रोशीको ०.६२ र भुम्लु गाउँपालिकाको ०.६८ प्रतिशत रहेको छ ।
प्रतिक्रिया दिनुहोस्