काठमाडौं । चालु आर्थिक वर्षको १० महिना (साउनदेखि वैशाख मसान्तसम्म) मा नेपालको कुल वैदेशिक व्यापार १९ खर्ब ४१ अर्ब ६० करोड रुपैयाँ पुगेको छ ।
भन्सार विभागले सार्वजनिक गरेको तथ्यांक अनुसार समीक्षा अवधिमा आयात र निर्यात दुवैमा वृद्धि भएको देखिए पनि व्यापार घाटाको आकार भने चुलिँदै गएको छ ।
आयातमा १४.८२ प्रतिशतको वृद्धि
विभागका अनुसार वैशाख मसान्तसम्म नेपालले विभिन्न मुलुकबाट १६ खर्ब ९२ अर्ब ६४ करोड रुपैयाँ बराबरको वस्तु तथा सेवा आयात गरेको छ । यो अघिल्लो आर्थिक वर्षको सोही अवधिको तुलनामा १४.८२ प्रतिशतले बढी हो । अघिल्लो वर्षको यसै अवधिमा १४ खर्ब ७४ अर्ब १८ करोड रुपैयाँ बराबरको आयात भएको थियो ।
निर्यातमा सुधार
आयातको तुलनामा आकार सानो भए पनि नेपालको निर्याततर्फ केही सुधार देखिएको छ । चालु आवको १० महिनामा नेपालले २ खर्ब ४८ अर्ब ९६ करोड रुपैयाँ बराबरको वस्तु तथा सेवा निर्यात गरेको छ । यो अघिल्लो आर्थिक वर्षको सोही अवधिको (२ खर्ब १७ अर्ब ९१ करोड) तुलनामा १४.२५ प्रतिशतले बढी हो ।
व्यापार घाटा १४ खर्ब ४३ अर्ब माथि
आयात र निर्यात दुवै बढे पनि आयातको हिस्सा अत्यधिक हुँदा नेपालको व्यापार घाटा झन् फराकिलो बन्दै गएको छ। समीक्षा अवधिमा नेपालको व्यापार घाटा १४ खर्ब ४३ अर्ब ६७ करोड रुपैयाँ पुगेको छ । जुन अघिल्लो वर्षको तुलनामा १४.९२ प्रतिशतको वृद्धि हो । अघिल्लो वर्ष सोही अवधिमा यस्तो घाटा १२ खर्ब ५६ अर्ब २७ करोड रुपैयाँ मात्र थियो ।
तथ्यांक अनुसार कुल वैदेशिक व्यापारमा आयातको हिस्सा मात्रै ८७.१७ प्रतिशत रहेको छ भने निर्यातको हिस्सा निकै कमजोर छ । नेपालबाट १२.८२ प्रतिशत मालवस्तु निर्यात भएको छ। यसैगरी, आयात र निर्यातको अनुपात (रेसियो )६.७९ प्रतिशत रहेको विभागको तथ्याङ्कले देखाउँछ ।
प्रतिक्रिया दिनुहोस्