काठमाडौं ।बर्खे धान रोपाइँको मुख्य सिजन सुरु भइसक्दा पनि सुदूरपश्चिम प्रदेशका ९ जिल्लाका २६ स्थानीय तहले कोटामा पाएको रासायनिक मल अझैसम्म नउठाएको पाइएको छ।
कृषि, वन तथा पर्यावरण मन्त्रालयले पटक–पटक जानकारी गराउँदा र ताकेता गर्दा समेत ती पालिकाहरूले मल ढुवानी गर्न चासो नदेखाएको उल्लेख गर्दै तुरुन्तै मल नलगे कृषि सामग्री कम्पनी लिमिटेड र साल्ट ट्रेडिङ कर्पोरेशनका डिपोहरू मार्फत किसानलाई सिधै मल बिक्री खुल्ला गरिने कडा चेतावनी दिएको छ।
कृषि सामग्री र साल्ट ट्रेडिङको पछिल्लो तथ्यांक अनुसार पहाडी तथा हिमाली जिल्लाहरू डडेलधुरा, बैतडी, दार्चुला, बाजुरा, बझाङ र डोटीका स्थानीय तहहरूले तोकिएको परिमाणको मल उठाएका छैनन्। यस्तै, सुगम मानिने तराईका जिल्लाहरूमा समेत ठूलो परिमाणमा मल उठ्न बाँकी छ ।
मन्त्रालयका अनुसार कैलालीको गोदावरी नगरपालिकाले २१ हजार २३० किलो, धनगढी उपमहानगरपालिकाले २१ हजार ५०० किलो, जानकी गाउँपालिकाले १० हजार २५० किलो र गौरीगंगा नगरपालिकाले ६ हजार ६९० किलो मल उठाएका छैनन्। कञ्चनपुरको भीमदत्त नगरपालिकाले १ लाख ६ हजार ८०० किलो र वेदकोट नगरपालिकाले १ लाख ६ हजार ४ सय किलो मल लगेका छैनन् ।
यसैगरी, अछाम जिल्लाका ५ स्थानीय तहमध्ये साँफेबगर नगरपालिका, बन्नीगढ जयगढ गाउँपालिका र कमलबजार नगरपालिकाले मल लगेका छैनन्।
त्यस्तै, सुदूरपश्चिम प्रदेशमा साल्ट ट्रेडिङ कर्पोरेशनमार्फत वितरण हुने मलमध्ये कैलालीमा ३४ प्रतिशत र कञ्चनपुरमा ५४ प्रतिशत हिस्सा छ। बाँकी १२ प्रतिशत मल अन्य जिल्लाका स्थानीय तहमा वितरण गरिने व्यवस्था रहे पनि ती जिल्लाबाट अपेक्षित रूपमा मल उठाउन सकेको छैन । सुदूरपश्चिम प्रदेशमा ४३ पालिकाले रासायनिक मल बिक्रि गर्दै आएका छन् । यसमध्ये १७ पालिकाले लगेपनि २६ पालिकाले मल नलगेको मन्त्रालयले जनाएको छ।
प्रतिक्रिया दिनुहोस्