काठमाडौं । चिनियाँ कृत्रिम बौद्धिकता (एआई) कम्पनी डिपसिकले पहिलो लगानी सङ्कलन चरणमै ५० अर्ब अमेरिकी डलरभन्दा बढी मूल्याङ्कन हासिल गरेको छ। हालै सम्पन्न लगानी चरणपछि कम्पनी विश्व कृत्रिम बौद्धिकता उद्योगको तीव्र गतिमा उदीयमान खेलाडीका रूपमा स्थापित भएको हाे।
वाल स्ट्रिट जर्नल र द इन्फर्मेसनका अनुसार कम्पनीले पछिल्लो चरणमा ५० अर्ब युआन (करिब ७ अर्ब ४० करोड अमेरिकी डलर) भन्दा बढी पूँजी जुटाएको छ। यस लगानी चरणपछि डिपसिकको मूल्याङ्कन ५० अर्ब डलरभन्दा माथि पुगेको बताइएको छ। यद्यपि, कम्पनीले यस विषयमा सार्वजनिक टिप्पणी गरेको छैन।
डिपसिकले सन् २०२५ मा कम लागतमा विकसित संवादात्मक प्रणाली सार्वजनिक गर्दै विश्वव्यापी ध्यान आकर्षित गरेको थियो। कम्पनीले यस वर्ष अप्रिलमा नयाँ कृत्रिम बौद्धिकता नमुना पनि सार्वजनिक गरेको थियो, जसले यस क्षेत्रका यसको उपस्थिति थप बलियो बनाएको छ।
रिपोर्टअनुसार कम्पनीका संस्थापक लियाङ वेनफेङले व्यक्तिगत रूपमा करिब २० अर्ब युआन लगानी गरेका छन्। उनले सीमित साझेदारी संरचनामार्फत कम्पनीमाथिको नियन्त्रण कायम राख्ने विशेष लगानी ढाँचा अपनाएको बताइएको छ।
चीन सरकार समर्थित राष्ट्रिय कृत्रिम बौद्धिकता उद्योग लगानी कोषले करिब एक अर्ब युआन लगानी गरेको छ। साथै टेनसेन्ट, जेडी डटकम र नेटइजजस्ता ठूला चिनियाँ प्रविधि कम्पनीहरू पनि लगानीकर्ताका रूपमा सहभागी रहेको जनाइएको छ।
यसैबीच, वासिङ्टनले डिपसिकको पछिल्लो कृत्रिम बौद्धिकता नमुनालाई चीनकै उन्नत प्रविधिमध्ये एक मानिए पनि अमेरिकी कम्पनीहरूको तुलनामा करिब आठ महिना पछाडि रहेको मूल्याङ्कन गरेको बताइएको छ।
कृत्रिम बौद्धिकता उद्योगमा अत्याधुनिक नमुना विकास र सञ्चालनका लागि विशाल कम्प्युटिङ पूर्वाधारमा अर्बौं डलर लगानी आवश्यक पर्छ। तर विश्वका अधिकांश प्रमुख कृत्रिम बौद्धिकता कम्पनीहरू अझै नाफामा पुग्न नसकेको र दिगो व्यावसायिक मोडेल निर्माणको चुनौती सामना गरिरहेका छन्।
हाल अमेरिकी कृत्रिम बौद्धिकता कम्पनी एन्थ्रोपिकको मूल्याङ्कन करिब ६५ अर्ब डलर पुगेको छ भने च्याटजिपिटी निर्माता ओपनएआईको मूल्याङ्कन मार्चमा करिब ८५२ अर्ब डलर रहेको बताइएको छ। विश्लेषकहरूका अनुसार यी कम्पनीहरूको सार्वजनिक सूचीकरणतर्फको तयारीले निजी कृत्रिम बौद्धिकता लगानी बजार नयाँ चरणमा प्रवेश गरिरहेको सङ्केत गरेको छ।
प्रतिक्रिया दिनुहोस्