कर्पोरेट समाचार 
काठमाडौं । काठमाडौं महानगरपालिकाले ‘बुलेट आमा’ भनेर चिनिने शुशिला उप्रेती तिवारीको बुलेट मोटरसाइकल यात्राको प्रशंशा गर्दै उनको यात्राको कदर गरेको छ । आज महानगरकी उपप्रमुख सुनिता डंगोलले तिवारीलाई प्रशंशा पत्र प्रदान गर्दै आगामी अन्तरदेशीय यात्राका लागि सफलताको शुभकामना दिइन् ।
उनले तिवारीको मोटरसाइकल यात्रा सहासी नेपाली महिलालाई प्रतिनिधित्व गर्ने सन्देश भएको उल्लेख गरिन । ‘नेपाली महिलाहरुले लगाउने गुन्युचोली लगाएर ५५ वर्षको उमेरमा मोटरसाइकलबाट यात्रा गर्नु अरु महिलाहरुका लागि केही नयाँ गर्न सकिन्छ भन्ने उत्प्रेरणा हो’,डंगोलले भनिन् ।
त्यस क्रममा निमित्त प्रमुख प्रशासकीय अधिकृत नुरनिधि न्यौपानेले मायाको चिनो प्रदान गरे । झापाको बुधबारे बसोबास गर्नेे ५५ वर्षिया तिवारीले नेपाली महिलाको राष्ट्रिय पोशाक ‘गुन्युचोली’ लगाएर विश्वशान्तिको कामना गर्दै गत भदौ ५ गते मेचीबाट मोटरसाइकल यात्रा थालनी गरेकी थिइन् ।
उनले यात्राको नवौँ दिनको मध्यान्नमा सुदुरपश्चिम प्रदेश, कञ्चनपुर जिल्लाको गड्डाचौकीमा पुगेर त्यस चरणको यात्रा समापन गरिन् । अब उनले आगामी यात्राका लागि अन्तरदेशिय योजना बनाएको सुनाइन् । उनले भनिन्, ‘सहासी र शसक्त नेपाली महिलाको पहिचान प्रवर्धन गर्न अब भारत, बंगालादेश, मलेसिया हुँदै थाइल्याण्डसम्म यात्रा गर्नेछु । यात्राका क्रममा भेटिने हरेक व्यक्ति र समुदायको सहयोग लिएर यात्रा सम्पन्न गर्ने योजना छ ।’
प्रतिक्रिया दिनुहोस्