कर्पोरेट समाचार 
काठमाडौं । अछामको कमलबजार नगरपालिका –५ मा रहेको पाचुल्ली वनमा किर्ते कागजातका भरमा वन पैदावारको अनुमति ल्याएर फडानी गरिएको अभियोगमा वन समितिकै सचिव छत्रराज तिमिल्सेना पक्राउ परेका छन् ।
तिमिल्सेनाले पाँचुल्ली चैतेपातल सामुदायिक वन समितिको नाममा कीर्ते कागजात बनाएर वन डिभिजन कार्यालय मङ्गलसेनबाट चोत्रो (डाँठ, पात, बोक्रा) पैदावार बिक्री गर्ने अनुमति लिएर फडानी गरेको जानकारी आएपछि सोमबार समितिका सचिवलाई नै पक्राउ गरिएको डिभिजन वन कार्यालय अछामका प्रमुख जनक पाध्याले जानकारी दिए ।
उनले पक्राउ परेका तिमल्सेनालाई डिभिजन वन कार्यालयको पत्रका आधारमा जिल्ला प्रहरी कार्यालयको हिरासतमा राखी अनुसन्धानको प्रक्रिया अगाडि बढिसकेको बताए । वन ऐन, २०७६ अनुसार दुई लाख रुपैयाँ भन्दा बढी बिगो भएको र एक वर्षभन्दा बढी कैद हुने अवस्थाका मुद्दा अदालतमा जाने र अन्य मुद्दा वन डिभिजनले नै हेर्ने कानुनी व्यवस्था रहेको छ ।
सामुदायिक वनबाट चार हजार किलो चोत्रो (डाँठ, पात, बोक्रा) फडानी गरिएको छ । चोत्रो (डाँठ, पात, बोक्रा) को प्रतिकिलो १० बिगो हुने भएकाले ४० हजार जरिवाना हुने र अनुसन्धानमा केही थप देखिएमा सोही दफाअनुसार कारबाही हुने पाध्यायको भनाइ छ । नक्कली कागजात तयार पारेर वन पैदावरको अनुमति लिनका लागि अन्य व्यक्तिको संलग्नताबारे पनि अनुसन्धान भइरहेको जनाइएको छ ।
प्रतिक्रिया दिनुहोस्