कर्पोरेट समाचार 
काठमाडौं । सगरमाथा लुम्बिनी इन्स्योरेन्स कम्पनी लिमिटेडको २८औं वार्षिक साधारणसभा सम्पन्न भएको छ। आइतबार सम्पन्न साधारणसभामा कम्पनीका अध्यक्ष मनोहर दास मुलको सभापतित्वमा कम्पनीको आर्थिक वर्ष २०८०/८१ को वित्तीय विवरणलगायत महत्वपूर्ण प्रस्तावहरू पारित गरिएको छ ।
सभामा अध्यक्ष मुलले शेयरधनीहरूलाई सम्बोधन गर्दै कम्पनीको वित्तीय प्रदर्शन, सेवा विस्तार तथा रणनीतिक योजनाबारे विस्तृत जानकारी दिए । कम्पनीले आर्थिक वर्ष २०८०/८१ मा बीमा शुल्क आयतर्फ ४ अर्ब ७९ करोड रुपैयाँ आर्जन गर्न सफल भएको छ, जुन अघिल्लो वर्षको तुलनामा ४ प्रतिशतले वृद्धि हो। कम्पनीको गत वर्षको तुलनामा ३१ प्रतिशतले खुद मुनाफा वृद्धि भएको जनाएको छ।
यो आवमा कम्पनीले गत वर्षको तुलनामा बढी दाबी भुक्तानी गरेको उल्लेख गरेको छ। २०७९/८० मा २ अर्ब ३८ करोड रुपैयाँ दाबी भुक्तानी गरेकोमा २०८०/८१ मा यो संख्या २ अर्ब ८३ करोड रुपैयाँ पुगेको छ। उक्त रकम ४५ करोड रुपैयाँले बढी हो । यस्तै, कम्पनीले सेवा सुधार र डिजिटल प्रणालीमार्फत दाबी प्रक्रिया प्रभावकारी बनाउने प्रतिबद्धता जनाएको छ।
सभाले सञ्चालक समितिको प्रतिवेदन, लेखापरीक्षक नियुक्ति, १५ प्रतिशत नगद लाभांश वितरण, सञ्चालक बैठक भत्ता वृद्धि र सामाजिक उत्तरदायित्व अन्तर्गत खर्च गरिएको रकम समेत पारित गरेको छ। सभामा १७ जना शेयरधनीहरूले आ–आफ्ना धारणा राखेका थिए।
प्रतिक्रिया दिनुहोस्