काठमाडौं । पोखराको लिचीबारी जग्गा प्रकरणमा दुई पूर्वमन्त्रीसहित सातजनाविरुद्ध आज भ्रष्टाचार मुद्दा दायर भएको छ ।
तत्कालीन संघीय मामिला तथा सामान्य प्रशासनमन्त्री राजकुमार गुप्ता र पूर्वभूमि सुधारमन्त्री रञ्जित श्रेष्ठसहित सातजनाविरुद्ध अख्तियार दुरुपयोग अनुसन्धान आयोगले बुधबार विशेष अदालतमा मुद्दा दायर गरेको हो । साथै प्रतिवादीहरूविरुद्ध ७८ लाख बिगो दाबी समेत माग गरिएको छ।
सो जग्गाको ‘घुस डिल’ गरेको अडियो सार्वजनिक भएपछि पूर्वमन्त्रीद्वय गुप्ता र श्रेष्ठसहितलाई अख्तियारले बयान लिएर अनुसन्धान अघि बढाएको थियो । पोखराको बाटुलेचौरस्थित लिची बगानको १३४ रोपनी जग्गा सुकुम्बासीका नाममा बाँडेर लाभ उठाउने गरी तत्कालीन मन्त्रीहरूसहित कर्मचारी र बिचौलियाबीच फोनमा भएको अडियो कुराकानी सार्वजनिक भएको थियो । २८ असार, २०८२ मा उक्त अडियो सार्वजनिक भएसँगै गुप्ताले ५३ लाख रुपैयाँ घुस लिएको प्रमाणहरु बाहिरिएका थिए । त्यसको व्यापक विरोध भएपछि गुप्ता राजीनामा दिन बाध्य भएका थिए ।
‘लिचीबारी प्रकरण’मा मुद्दा अघि बढाएको आयोगले तत्कालीन मालपोत कार्यालय कास्कीका मालपोत अधिकृत रामचन्द्र अधिकारी र घुस डिल प्रकरणमा संलग्न सुजनकुमार तामाङ, एमकुमारी गुरुङ, तुल्सीराम बुढामगर र खमबहादुर पुनलाई प्रतिवादी बनाएको छ । आयोगले अधिकारीविरुद्ध ५३ लाख, गुरुङविरुद्ध २५ लाख, बुढामगरविरुद्ध ७८ लाख र पुनविरुद्ध २५ लाख बिगो मागदाबी गरेको छ ।
तर, आयोगले तत्कालीन भूमिसुधारमन्त्री तथा एमाले नेता बलराम अधिकारीलाई भने मुद्दामा प्रतिवादी बनाइएको छैन । यो प्रकरणमा उनको नाम पनि मुछिएको थियो ।
प्रतिक्रिया दिनुहोस्