काठमाडौं । केन्द्रीय बैंकले व्यक्तिगत ओभरड्राफ्ट (अधिविकर्ष) कर्जाको सीमालाई बढाएको छ । सोमबार राष्ट्र बैंकले चालु आर्थिक वर्ष २०८२/८३ को मौद्रिक नीतिको प्रथम त्रैमासिक समीक्षामार्फत व्यक्तिगत ओभरड्राफ्ट कर्जाको सीमालाई ५० लाख रुपैयाँले बढाएर एक करोड रुपैयाँ पुर्याउने जनाएको हो ।
हाल व्यक्तिगत ओभरड्राफ्टको सीमा ५० लाख रुपैयाँसम्म रहेको छ । त्यसलाई बढाएर १ करोड रुपैयाँ पुर्याउने मौद्रिक नीतिको प्रथम त्रैमासिक समीक्षामा उल्लेख छ ।
यस्तै, राष्ट्र बैंकले लघुवित्त वित्तीय संस्थाबाट धितोमा प्रवाह गरिने कर्जाको अधिकतम सीमा पनि बढाएको छ । हाल ७ लाख रुपैयाँसम्म रहेको यस्तो सीमा वृद्धि गरी १५ लाख रुपैयाँ पुर्याउने भएको हो । ‘लघुवित्त वित्तीय संस्थाबाट धितोमा प्रवाह गरिने कर्जाको अधिकतम सीमा ७ लाख रुपैयाँबाट वृद्धि गरी १५ लाख रुपैयाँ कायम गरिनेछ’मौद्रिक नीतिको समीक्षामा भनिएको छ ।
यसैगरी, लघुवित्तबाट ऋण पाएका ऋणीहरुको कर्जा भुक्तानीमा पर्न गएको समस्यालाई ध्यानमा राखी कर्जा भुक्तानीको तालिका परिमार्जन गर्न सकिने व्यवस्था गर्ने घोषणा पनि मौद्रिक नीति समीक्षाले गरेको छ।
प्रतिक्रिया दिनुहोस्