वीरगञ्ज भन्सारमा ’पेन डाउन’को असर : ५७ करोडको दैनिक आम्दानी शून्यमा झर्यो

वीरगञ्ज । देशको राष्ट्रिय राजस्वमा सर्वाधिक योगदान दिने वीरगञ्ज भन्सार कार्यालयको दैनिक ५७ करोड रुपैयाँभन्दा बढी आम्दानी शून्यमा झरेको छ । भन्सार एजेन्ट महासंघ नेपालले आज बिहानैदेखि ’पेन डाउन’ (कागजी कार्य बहिष्कार) गर्ने घोषणा गरेपछि मंगलबार यस भन्सार कार्यालयका सम्पूर्णजसो सेवा ठप्प बन्दा आम्दानी शून्यमा झरेको हो ।

भन्सार एजेन्टहरूले भन्सार ऐन २०८२ मा समावेश गरिएका केही प्रावधानको विरोध गर्दै आन्दोलनलाई देशव्यापी बनाएका हुन् । वीरगञ्ज भन्सार कार्यालयका सूचना अधिकारी उदयसिंह विष्टले भन्सार एजेन्टहरूको कामकाज बन्द गरेपछि कार्यालयको सम्पूर्ण गतिविधि अवरुद्ध भएको र राजस्व सङ्कलन शून्य भएको पुष्टि गरे । आइतबारदेखि नै छलफल जारी रहेपनि महासंघले देशव्यापी आन्दोलनमा जाने निर्णय गरेपछि यो अवस्था आएको उनको भनाइ छ ।

भन्सार एजेन्ट संघ वीरगञ्जका अध्यक्ष राजमान तामाङका अनुसार उनीहरूले भन्सार ऐन २०८१ को उपदफा ७१ को (झ) मा गरिएको व्यवस्था तत्काल हटाउन आफूहरुले माग गरेको बताए । यो प्रावधानअनुसार स–साना मानवीय त्रुटिका कारण घोषणा गरिएको रकमको १० प्रतिशत जरिवाना भन्सार एजेन्टले नै तिर्नुपर्ने अव्यावहारिक व्यवस्था छ, जसले एजेन्टहरूलाई मार परेको उनको भनाइ छ। उक्त व्यवस्था खारेज नभएसम्म काममा नफर्किने एजेन्टहरूको अडान छ ।

वीरगञ्ज भन्सार कार्यालयले मासिक साढे सत्र अर्ब रुपैयाँभन्दा बढी राजस्व सङ्कलन गर्दै आएको छ । यो नाकाबाट नेपालका लागि ७५ प्रतिशतभन्दा बढी खाद्य पदार्थ र ७० प्रतिशतभन्दा बढी औद्योगिक कच्चा पदार्थ तथा पेट्रोलियम पदार्थको आयात हुने गर्दछ । राजस्वको प्रमुख स्रोत र अर्थतन्त्रको मेरुदण्ड मानिने यो नाकाको अवरोध लम्बिएमा यसको नकारात्मक प्रभाव देशभरका उपभोक्ताहरूले आपूर्ति सङ्कट र मूल्यवृद्धिको रूपमा व्यहोर्नुपर्ने अवस्था आउने चेतावनी सरोकारवालाहरूले दिएका छन् ।

 

प्रतिक्रिया दिनुहोस्