काठमाडौं। साताको पहिलो कारोबार दिन आज नेपाली बजारमा सुनचाँदीको मूल्य बढेसँगै दुवै धातुको कारोबार मूल्य उच्च विन्दुमा पुगेको छ।
निरन्तर बढिरहेको सुनको मूल्य आज यसअघिको रेकर्डमै पुगेको छ । यसअघि गत पुस १३ गते सुन प्रतितोला दुई लाख ७० हजार ६ सय रुपैयाँ कायम भई उच्च मूल्यको रेकर्ड बनाएको सुनको भाउमा आइतबार पुनः सोही मूल्यको रेकर्ड कायम भएको हो ।
नेपाल सुनचाँदी व्यवसायी महासंघका अनुसार आज छापावाल सुनको मूल्य तोलामा दुई हजार ८ सय रुपैयाँले वृद्धि भएको छ। मूल्य बढेसँगै आइतबार एक तोला सुन खरिद गर्न उपभोक्ताले दुई लाख ७० हजार ६०० रुपैयाँ तिर्नुपर्ने भएको छ । आज कायम भएको यो मूल्य गत पुस १३ गतेको रेकर्ड बराबर हो । अघिल्लो कारोबार दिन (शुक्रबार) त्यति नै परिमाणको सुन दुई लाख ६७ हजार ८०० रुपैयाँमा खरिदबिक्री भएको थियो ।
यस्तै, चाँदीको मूल्य पनि चार हजार ९९० रुपैयाँ पुगेको छ। यसअघि शुक्रबार चाँदीको भाउ तोलाको चार हजार ७८० रुपैयाँ कायम थियो। आज चाँदी प्रतितोला २१० रुपैयाँले बढेको छ भने यो मूल्य हालसम्मकै उच्च हो ।
अन्तर्राष्ट्रिय बजारमा आज सुन प्रतिऔंस ४ हजार पाँच सय १० अमेरिकी डलरमा कारोबार भइरहेको छ।
प्रतिक्रिया दिनुहोस्