कर्पोरेट समाचार 
काठमाडौं। नेपाल स्टक ब्रोकर एशोसिएसन अफ नेपालले अर्थमन्त्रीलाई भेट गरी पुँजीबजार र धितोपत्र दलाल व्यवसायीहरूले भोग्दै आएका समस्या समाधान गर्न माग गरेको छ। एशोसिएसनले बजारमा हाल ७६ लाख लगानीकर्ता र ९२ वटा ब्रोकरहरू रहेको जानकारी दिँदै नयाँ सरकार र अर्थमन्त्रीबाट बजार सुधारको अपेक्षा राखेको जनाएको हो ।
सोमबार स्टक ब्रोकर एशोसिएसनका प्रतिनिधिले भेटका क्रममा अर्थमन्त्री डा.स्वर्णिम वाग्लेलाई बुझाएको पत्रमा मुख्यगरी पुँजीबजार सुधार कार्यदलले दिएको सुझाव कार्यान्वयनदेखि अक्सन मार्केटको सुरुवात गर्नुपर्नेसम्मका ६ बुँदे मागहरू राखेका छन्।
पहिलोमा पुँजीबजार सुधार कार्यदलले दिएका तर कार्यान्वयन हुन बाँकी रहेका सुझावहरूलाई अविलम्ब लागू गर्न एशोसिएसनको माग छ।
बैंक तथा वित्तीय संस्थाको प्रवेश : यस्तै, बैंक तथा वित्तीय संस्थाहरूलाई पुँजीबजारमा सहज रूपमा प्रवेश र बाहिरिन सक्ने व्यवस्था मिलाउनुपर्ने उनीहरुको माग छ। मागपत्रमा हाल खरिद गरेको सेयर ६ महिनाको अवधि पश्चात् मात्र बिक्री गर्न पाउने व्यवस्था रहेकोमा त्यसलाई सहज बनाउन जोड दिइएको छ।
गैर आवासीय नेपालीलाई प्रवेश : गैर आवासीय नेपाली नागरिकहरूलाई पनि दोस्रो बजारमा सहज रूपमा सेयर कारोबार गर्न पाउने व्यवस्था अविलम्ब गरिनुपर्ने एशोसिएसनको माग छ ।
अन्तिम करको स्पष्टता र लगानी वातावरण : आगामी बजेटमार्फत पुँजीगत लाभकरलाई नै ‘अन्तिम कर’ हो भनी प्रष्ट पार्न र सरकारी संस्थानहरूमा विभिन्न कोषका नाममा रहेको रकमलाई दोस्रो बजारमा लगानी गर्ने वातावरण बनाउन आग्रह गरिएको छ।
अक्सन मार्केटको सुरुवात : धितोपत्र हस्तान्तरण गर्न नसक्दा सिधै ‘क्लोज आउट’ मा लगिने व्यवस्थाले लगानीकर्ता मारमा परेको भन्दै यसको समाधानका लागि ‘अक्सन मार्केट’ यथाशीघ्र सुरु गर्न अर्थमन्त्रीसँग उनीहरुले माग गरेका छन् ।
सेटलमेन्ट ग्यारेन्टी फण्ड : २०७५ सालमा विनियमावली र २०७९ सालमा कार्यविधि बने पनि हालसम्म कार्यान्वयनमा नआएको ‘सेटलमेन्ट ग्यारेन्टी फण्ड’प्रयोगमा ल्याउन नियामक निकायलाई निर्देशन दिनुपर्नेमा एशोसिएसनले जोड दिएको छ ।
एशोसिएसनका महासचिव भक्तिराम घिमिरेद्वारा हस्ताक्षरित सो पत्रमा यी समस्या समाधान भएमा समग्र पुँजीबजारको समस्या हल हुने र लगानीकर्ताहरूको मनोबल बढ्ने विश्वास गरिएको छ।
प्रतिक्रिया दिनुहोस्