काठमाडौं । नेपाल राष्ट्र बैंकले बजारमा रहेको अधिक तरलता व्यवस्थापनका लागि आज २५ अर्ब रुपैयाँ बराबरको निक्षेप झिक्न लागेको छ ।
सो रकमको मौद्रिक व्यवस्थापन विभागले बुधबार एक सूचना जारी गर्दै निक्षेप संकलन उपकरण मार्फत ५६ दिनका लागि उक्त रकम तान्न लागेको जानकारी दिएको हो।
जसको बोलकबोल बुधबार दिउँसो ३ बजे अनलाइन बिडिङ सिस्टम सफ्टवेयर मार्फत हुने केन्द्रीय बैंकले जनाएको छ । सो रकमको साँवा तथा ब्याज भुक्तानी भने २०८३ जेठ २० गते दिइने छ । निक्षेप संकलन प्रक्रियामा राष्ट्र बैंकबाट इजाजतप्राप्त क, ख र ग वर्गका बैंक तथा वित्तीय संस्थाहरू मात्र सहभागी हुन पाउनेछन्। इच्छुक संस्थाहरूले घटीमा १० करोड रुपैयाँ र बढीमा ५ करोड रुपैयाँले भाग जाने गरी कुल आह्वान रकमसम्मका लागि बोलकबोल गर्न सक्नेछन्।
बोलकबोलको माध्यमबाटै ब्याजदर निर्धारण गरिनेछ। कम ब्याजदर बोल गर्ने संस्थालाई प्राथमिकता दिइने केन्द्रीय बैंकले जनाएको छ ।बोलपत्र स्वीकृत भएका संस्थाहरूको खातामा पर्याप्त मौज्दात नभएमा उनीहरूलाई कालोसूचीमा राखी आगामी बोलकबोलमा सहभागी हुन बन्देज लगाइने समेत राष्ट्र बैंकले सूचनामार्फत स्पष्ट पारेको छ।
प्रतिक्रिया दिनुहोस्