काठमाडौं । स्वदेशमै उच्च शिक्षा अध्ययन गर्ने विद्यार्थीको सङ्ख्या बढ्दै गएको छ । आर्थिक सर्वेक्षण २०८२/८३ अनुसार आर्थिक वर्ष २०८१/८२ मा उच्च शिक्षा अध्ययन गर्ने विद्यार्थीको सङ्ख्या १० दशमलव ९ प्रतिशतले वृद्धि भई सात लाख ४५ हजार ७७० पुगेको छ ।
अघिल्लो आर्थिक वर्ष २०८०८१ मा यस्तो सङ्ख्या छ लाख ७२ हजार ४८९ रहेको थियो । सर्वेक्षणअनुसार उच्च शिक्षामा व्यवस्थापन सङ्काय सबैभन्दा आकर्षणको केन्द्र बनेको छ । कुल विद्यार्थीमध्ये ५० दशमलव ५ प्रतिशत व्यवस्थापन सङ्कायमा अध्ययनरत छन् भने कृषिमा सबैभन्दा कम शून्य दशमलव १५ प्रतिशत विद्यार्थी रहेका छन् ।
व्यवस्थापन, शिक्षाशास्त्र तथा मानविकी–समाजशास्त्र सङ्कायमा मात्रै करिब ८० प्रतिशत विद्यार्थी अध्ययनरत रहेको तथ्यांकले देखाएको छ ।
उच्च शिक्षामा त्रिभुवन विश्वविद्यालयको प्रभुत्व अझै कायम छ । त्रिविअन्तर्गत आङ्गिक र सम्बन्धन प्राप्त क्याम्पसमा अध्ययन गर्ने विद्यार्थी कुलको ७५ दशमलव ३ प्रतिशत रहेका छन् ।
हाल नेपालमा १५ केन्द्रीय र ६ प्रादेशिक गरी २१ विश्वविद्यालय सञ्चालनमा छन् भने आठ स्वास्थ्य विज्ञान प्रतिष्ठान रहेका छन् ।
प्रतिक्रिया दिनुहोस्