काठमाडौं । ‘रियल ड्राइभर्स वान्टेड’ भन्ने नारासहित स्कोडा नेपालले आफ्नो फेसलिफ्ट गरिएको नयाँ स्कोडा कुशाक सार्वजनिक गरेको छ।
आइतबार थापाथलिस्थित शोरुममा नयाँ स्कोडा कुशाकको अनावरण एमएडब्लु समूहका अध्यक्ष विष्णु कुमार अग्रवाल तथा एमएडब्लु एक्सपान्जेका प्रमुख कार्यकारी अधिकृत रौनक अग्रवालले संयुक्त रूपमा गरे।
अरूले गाडीको स्वामित्व लिन्छन्, तर ‘रियल ड्राइभर्स’ले सडकको स्वामित्व लिन्छन् भन्ने स्पष्ट सन्देशसहित कुशाकलाई तुलना गर्ने सूचीमा उत्कृष्ट देखिनका लागि मात्र तयार नगरिएको कम्पनीको भनाइ छ। १.० लिटर र १.५ लिटर टीएसआई इन्जिन विकल्पमा उपलब्ध यो गाडी ८–स्पिड अटोमेटिक तथा डीएसजी ट्रान्समिसनसँग सुसज्जित छ, जसले उत्कृष्ट नियन्त्रण र द्रुत प्रतिक्रिया प्रदान गर्दै वास्तविक ड्राइभिङ आनन्दको अनुभूति गराउने कम्पनीले जनाएको छ।
कम्पनीका अनुसार गाडीको भित्री भागमा रहेको रियर सिट मसाज फिचरले यस सेग्मेन्टमा विरलै पाइने युरोपेली स्तरको आराम प्रदान गर्दछ, जसले कुशाकलाई पहिले उत्कृष्ट इन्जिनियरिङ र त्यसपछि आरामलाई प्राथमिकता दिएर निर्माण गरिएको सवारीसाधन भएको पुष्टि गर्छ। नेपालमा कुशाकलाई विशेष बनाउने पक्ष यसको विशेषतासँगै स्वामित्व लागत पनि रहेको बताइएको छ। युरोपेली इन्जिनियरिङको विरासत बोकेको अन्तर्राष्ट्रिय ब्रान्डको यो एसयूभी ग्राहकले ५७ लाख ९० हजार रुपैयाँको प्रारम्भिक मूल्यमा पाउनेछन् । जसले विश्वस्तरीय ड्राइभिङ अनुभवलाई नेपाली उपभोक्ताको पहुँचभित्र ल्याएको कम्पनीको दाबी छ।
कम्पनीका अनुसार यसको स्वामित्वलाई अझ सहज बनाउन ‘प्रमिस अफ १२’ वार्षिक मर्मत योजना पनि ल्याइएको छ, जुन देशभर रहेका १२ वटा सेवा केन्द्रमा उपलब्ध हुनेछ। यस योजनाअन्तर्गत कुनै लुकेका शुल्क नहुने र प्रत्येक १२ महिना वा १२ हजार किलोमिटरमा केवल १२ हजार रुपैयाँको निश्चित लागतमा मर्मत सेवा उपलब्ध गराइनेछ। कार्यक्रममा बोल्दै एमएडब्लु समूहका अध्यक्ष विष्णु अग्रवालले भने, ‘कुशाकले नेपाली सडकमा युरोपेली इन्जिनियरिङको अनुभव ल्याएको छ, तर नेपाली चालकलाई युरोपेली मूल्य तिर्न बाध्य बनाएको छैन। यही नै वास्तविक मूल्य हो।’
त्यस्तै, एमएडब्लु एक्सपान्जेका प्रमुख कार्यकारी अधिकृत रौनक अग्रवालले यस गाडीमा ड्राइभिङ अनुभव राम्रो दिने बताए । उनले भने, ‘यो गाडी त्यस्ता व्यक्तिहरूका लागि निर्माण गरिएको हो, जसलाई आफूले ड्राइभिङबाट के अपेक्षा गर्छन् भन्ने स्पष्ट रूपमा थाहा छ। हामी उनीहरूलाई यसबारे सुन्न मात्र होइन, स्वयं अनुभव गर्न आमन्त्रण गरिरहेका छौँ।’ यस सार्वजनिकसँगै स्कोडा नेपालले नेपाली बजारमा कुशाकलाई वास्तविक चालकका लागि बनाइएको एसयूभीको स्पष्ट पहिचानका रूपमा स्थापित गरेको कम्पनीको भनाइ छ ।
कार्यक्रममा कम्पनीका नेतृत्व, व्यावसायिक साझेदार, सञ्चारकर्मी तथा आमन्त्रित अतिथिहरूको उपस्थिति रहेको थियो। स्कोडा नेपालले सुरक्षा, इन्धन दक्षता तथा नवीन इन्जिनियरिङमा विशेष ध्यान केन्द्रित गर्दै गुणस्तर, आराम तथा विश्वसनीयतामा नयाँ मापदण्ड स्थापित गर्दै आएको जनाएको छ। नेपालमा स्कोडा ब्रान्डको आधिकारिक प्रतिनिधित्व एमएडब्लु समूहको अटोमोबाइल क्षेत्रअन्तर्गतको कम्पनी एमएडब्लु वृद्धि हो ।
प्रतिक्रिया दिनुहोस्