काठमाडौं । निरन्तरको वर्षासँगै मुग्लिन–नारायणगढ सडकखण्डका विभिन्न स्थानमा पहिरो तथा माथिबाट लेदो खसेपछि सडक दुवैतर्फ पूर्ण रूपमा अवरुद्ध भएको छ।
सडक डिभिजन भरतपुरका अनुसार पहिरो पन्छाउने कार्य तीव्र रूपमा भइरहेको छ। डिभिजनले तैनाथ अवस्थामा राखिएका चार वटा हेभी मेसिन प्रयोग गरेर सडक खुलाउने प्रयास जारी राखेको जनाएको छ।
यता, यात्रुको सुरक्षालाई मध्यनजर गर्दै जिल्ला प्रशासन कार्यालय, चितवनले अर्को सूचना जारी नभएसम्मका लागि सबै प्रकारका सवारीसाधन सञ्चालनमा रोक लगाएको छ।
सडक खुलाउने प्रयास जारी रहेकाले अत्यावश्यक बाहेक उक्त सडकखण्डमा यात्रा नगर्न तथा सम्बन्धित निकायको पछिल्लो सूचना पालना गर्न प्रशासनले आग्रह गरेको छ।
प्रतिक्रिया दिनुहोस्