काठमाडौं। सुनसरीको देवानगञ्जमा भएको घटनालगायत समसामयिक विषयमा छलफल गर्न राष्ट्रिय स्वतन्त्र पार्टी (रास्वपा)का सभापति रवि लामिछाने ले सर्वदलीय बैठक बोलाएका छन् ।
रास्वपाका अनुसार बैठक भोलि बिहान ८ बजे सिंहदरबारस्थित लेखा समितिको बैठक कक्षमा बस्नेछ। बैठकमा संघीय संसदमा प्रतिनिधित्व गर्ने सबै राजनीतिक दललाई आमन्त्रण गरिएको छ। साथै, उपेन्द्र यादव, महन्थ ठाकुर र सीके राउत नेतृत्वका दललाई पनि छलफलमा सहभागी हुन निमन्त्रणा गरिएको रास्वपाले जनाएको छ।
रास्वपाका महामन्त्री विपिनकुमार आचार्यका अनुसार सबै दललाई औपचारिक पत्राचार गरिसकिएको छ भने सभापति लामिछानेले दलका शीर्ष नेताहरूसँग व्यक्तिगत रूपमा टेलिफोन सम्पर्क गरी बैठकमा सहभागी हुन आग्रह गरेका छन् ।
रास्वपाले सुनसरीको घटना अत्यन्तै संवेदनशील र दुःखद रहेको उल्लेख गर्दै त्यसबाट उत्पन्न असहज परिस्थितिमा सामाजिक रूपमा फैलन सक्ने द्वेष न्यूनीकरण, सामाजिक सद्भाव कायम तथा शान्ति–सुरक्षालाई थप मजबुत बनाउन प्रशासनिक प्रयाससँगै राजनीतिक तहबाट पनि साझा सन्देश र अपिल आवश्यक भएकाले सर्वदलीय छलफल आयोजना गरिएको जनाएको छ।
प्रतिक्रिया दिनुहोस्