कर्पोरेट समाचार 
काठमाडौं । प्रधानमन्त्री केपी शर्मा ओलीले बैंकहरूका साहु खराब हुँदा ऋणीहरू समस्यामा परेको टिप्पणी गरेका छन् ।
आज राष्ट्रिय श्रम तथा रोजगार सम्मेलन, २०८१ मा प्रधानमन्त्री ओलीले समस्यामा परेका ऋणीलाई बैंकका साहुले झन मार पर्ने गरी व्यवहार गर्ने गरेको भन्दै त्यसबाट जोगिनु पर्नेमा जोड दिए ।
उनले भने, ‘उद्योग व्यवसाय अफ्ठ्यारोमा परे भने बैंकहरू हतारहतार असुल गर्ने भन्नेतिर जाने कुराले गर्दा, असुल हुने स्थिति नै छैन उनीहरूको । खराब ऋणी भन्ने तर त्यहाँ साहु खराब हुन्छन् । अफ्ठ्यारो बेलामा मद्दत गरेर अगाडि बढाउन मद्दत गर्नुपर्ने ठाउँमा मद्दत नगरेर घाँटी निचोर्ने काम गरियो । यस कुराबाट हामी जोगिनुपर्छ ।’
ऋणी डुब्दै छ भने उसलाई पहिला उतार्नुपर्ने धारणा राखेका ओलीले ऋणीलाई मद्दत गरेर तरिका मिलाएर असुल गर्नुपर्ने बताए । ऋणी डुब्यो भने उसले लिएको ऋण तिर्न नसक्ने भन्दै उनले थपे, ‘ तरिका मिलाएर रिटर्न हुन्छ । ऊ डुब्दै छ भने उसलाई पहिला उतार्नुपर्यो । ऋणी डुब्यो भने लिएको ऋण कहाँबाट तिर्नु ?’
यस्तै, प्रधानमन्त्री ओलीले बढी तरलता भएर चाहिन नचाहिने ठाउँमा बैंकहरूले लगानी गरेको भन्दै त्यसको असर सकारात्मक नहुने बताए । उनले भने, ‘बढी तरलताले अर्को दूष्परिणाम ल्याउँछ । त्यसपछि तरलता सकिन्छ।’
हरेक क्षेत्रलाई एक–अर्काको परिपूरकका रूपमा अगाडि बढाउनुपर्ने धारणा राखेका उनले निजी क्षेत्रले देशमा रोजगारीका अवसरहरु सिर्जना गर्न महत्वपूर्ण योगदान दिइरहेको बताए ।
प्रतिक्रिया दिनुहोस्