कर्पोरेट समाचार 
काठमाडाैं । नेपाल इन्भेष्टमेन्ट मेगा बैंकले आर्थिक वर्ष २०८१/८२ को तेस्रो त्रैमाससम्मको वित्तीय विवरण सार्वजनिक गरेको छ। बैंकले चैत्र मसान्तसम्म ४ अर्ब ५५ करोड रुपैयाँ खुद नाफा कमाउन सफल भएको छ, जुन अघिल्लो वर्षको सोही अवधिको नाफाको तुलनामा ३८.६१ प्रतिशतले बढी हो। अघिल्लो वर्षको यसै अवधिमा बैंकको नाफा ३ अर्ब २७ करोड रुपैयाँ रहेको थियो।
बैंकको खुद नाफासँगै प्रति सेयर आम्दानी (ईपीएस) पनि उल्लेखनीय रूपमा वृद्धि भएको छ। अघिल्लो वर्षको तुलनामा ४ रुपैयाँ ९४ पैसाले बढेर ईपीएस १७ रुपैयाँ ७४ पैसा पुगेको छ। यसले लगानीकर्ताहरूका लागि उत्साहजनक सन्देश दिएको छ।
हाल बैंकको चुक्ता पूँजी ३४ अर्ब १२ करोड रुपैयाँ कायम रहेको छ। बैंकको सञ्चित नोक्सानी ५ अर्ब ६९ करोडबाट घटेर १ अर्ब १० करोडमा झरेको छ, जसले वित्तीय स्वास्थ्यमा सुधार आएको संकेत गर्छ। जगेडा कोषमा पनि उल्लेखनीय वृद्धि भएको छ। गत वर्षको तुलनामा १८.४५ प्रतिशतले वृद्धि भई जगेडा कोष ३० अर्ब ८५ करोड रुपैयाँ पुगेको छ।
ग्राहक निक्षेप १३ प्रतिशतले वृद्धि भई ४५ खर्ब ५८ अर्ब रुपैयाँ पुगेको छ भने कर्जा प्रवाह पनि ७.३१ प्रतिशतले बढेर ३२ खर्ब ७८ अर्ब रुपैयाँ पुगेको छ। यता, बैंकको नेट व्याज आम्दानी भने ६.५० प्रतिशतले घटेर १० अर्ब ३१ करोड रुपैयाँमा सीमित भएको छ। तर शुद्ध शुल्क तथा कमिशन आम्दानी भने ३३.२४ प्रतिशतले वृद्धि भई १ अर्ब ५२ करोड रुपैयाँ पुगेको छ, जसले बैंकको कुल सञ्चालन आम्दानीलाई सन्तुलनमा राख्न मद्दत पुर्याएको देखिन्छ।
बैंकको गैर–सञ्चालित कर्जा (एनपीएल) १.५३ प्रतिशतमा सीमित रहेको छ, जुन नेपालको बैंकिङ क्षेत्रमा सन्तोषजनक दर मानिन्छ। बेस रेट ८.५२ प्रतिशतबाट घटेर ६.१० प्रतिशतमा झरेको छ भने ब्याज दर अन्तर (interest spread) ३.४५ प्रतिशतमा कायम रहेको छ।
नेपाल इन्भेष्टमेन्ट मेगा बैंकले आफ्नो वित्तीय अवस्था क्रमशः सुदृढ पार्दै लगेको संकेत दिएको छ। खुद नाफा, ईपीएस र सम्पत्ति वृद्धिले लगानीकर्ता र ग्राहकबीच सकारात्मक सन्देश पुर्याएको छ।
प्रतिक्रिया दिनुहोस्